لە ناحیەی پیرەمەگرون
منداڵێک کەوتە ژێر ئۆتۆمبێلەکەی مامی و گیانی لەدەستدا
964+
ئەحمەد محەمەد- سلێمانی
درەنگانێكی شەوی رابردوو، لە ناحیەی پیرەمەگرونی سەر بە قەزای دوكان كوڕێكی هەشت ساڵان دەكەوێتە ژێر ئۆتۆمبێلی مامی و دەست بەجێ گیان لەدەست دەدات.
لەبارەی رووداوەكەوە، موقەدەم هێمن فەرەج لێپرسراوی بنكەی هاتوچۆی پیرەمەگرون بە 964ـی وت، رووداوەكە لە جۆری شێلانە و درەنگانی شەوی رابردوو لە ناحیەی پیرەمەگرون روویداوە، مامێك لەكاتی بەگ داناندا برازایەكی خۆی دەكاتە ژێرەوە و لە شوێنی رووداوەكە گیانی لەدەستداوە.
وتیشی، منداڵەكە كوڕە و ناوی (د، م) تەمەنی هەشت ساڵانە و دانیشتووی ناحیەی پیرەمەگرونن.
وەك باسی دەكات، رووداوەكە قەزا و قەدەر بووە، لە بێ ئاگایدا روویداوە و مامی برازاكەی نەبینیووە كاتێك بە ئۆتۆمبێلەكەی بەگی داناوە.
ئەو لێپرسراوە ئەوەشی خستەڕوو، تیمی هاتوچۆی پیرەمەگرون كەشف و هێڵكاری بۆ رووداوەكە و چۆنیەتی روودانی كردووە، پۆلیسیش لێكۆڵینەوەی خۆی كردووە و پەڕاوەكەش خراوەتە بەردەم دادوەر بۆ بڕیاردان لەسەر رووداوەكە.
پێداچوونەوە: توانا نەقی
