بۆ پیاز خۆتان بگرن تا مانگی نیسان

+964

فەرمان سادق

حکومەتی لوبنان هەناردەی پیازی بۆ عێراق راگرت، سەرۆکی ئەنجومەنی عەلوەی هەولێریش دەڵێ، بەدیلمان هەیە و مانگی نیسانیش بەرهەمی خۆمان پیدەگات.

بەهۆی بەرزبوونەوەی نرخی پیاز، وەزارەتی کشتوکاڵی لوبنان بڕیاری قەدەغەکردنی هەناردەکردنی پیازی بۆ عێراق و هەرێمی کوردستان دەرکرد.

نووسراوەکە بە ژمارە (48/1) لە 15.2.2023 دەرچووە و واژۆی دکتۆر عەباس ئەلحاج حوسێن وەزیری کشتوکاڵی لوبنانی بەسەرەوەیە و هاتووە کە هەناردەکردنی پیاز پێویستی بەمۆڵەتی پێشوەختە هەیە.

تۆڕی964 دەزانێت، نرخی کیلۆیەک پیازی سپی لەعەلوەی هەولێر ئەمڕۆ بە 1400 بۆ 1500 دینارە، پیازی سوور بە 850 بۆ هەزار دینارە.

رەجەب عەزیز، سەرۆکی ئەنجومەنی عەلوەی هەولێر بە تۆڕی964ـی وت، خۆی پیازی لوبنانی بەکەمی هاوردەی بازاڕی کوردستان دەکرێت، ئێستا پیازی هیندی، یەمەنی و میسری بوونەتە شوێنگرەوەی پیازی لوبنانی.

“بەرهەمی پیازی باشووری عێراق لەمانگی نیسان پیدەگات، بەرهەمی پیازی هەولیر لەمانگی ئایار پیدەگات و پیازی سلێمانی و دهۆکیش لەمانگی حوزەیران پێدەگات”.

بەقسەی سەرۆکی ئەنجومەنی عەلوەی هەولێر بێت، پیازی هەولێر باشترینە لەسەر ئاستی کوردستان.