دزییەکەیان بۆ نەچووەسەر و هەڵاتن
بۆ دزیکردن هەڵیانکوتایە سەر خێزانێک و دەست و قاچیان بەستنەوە
964+
سیروان خورشید – دوزخورماتوو
لە داقوق چەند کەسێکی نەناسراو بۆ دزیکردن هەڵیانکوتایە سەر خێزانێک کە پێکدێن لە ژن و پیاوێکی بەتەمەن، هەردووکیان بەستنەوە، بەڵام دزییەکەیان بۆ نەچووەسەر و هەڵاتن.
عەقید محەمەد مەردان بەڕێوەبەری پۆلیسی داقوق بە 964ـی وت، “رووداوەکە کاتژمێر سێی بەرەبەیانی ئەمڕۆ شەممە 24.5.2025 لە گەڕەکی ئەیلخانلی روویداوە، ژن و پیاوێکی بەتەمەن لەنێو خانوویەکدا بەتەنیا دەژین، دزەکان هەڵیانکوتاوەتە سەریان، دەست و قاچی هەردووکیانیان بەستووەتەوە، لەو کاتدا ژنەکە هاواری کردووە و دراوسێکانیان بەهانایانەوە چوون و دواتر دزەکان هەڵاتوون”.
باسی لەوەشکرد، چەن مانگ لەمەوبەریش دز چووەتە هەمان ماڵ و هەرچی پارە و ئاڵتونی خێزانەکە هەبووە، بەتاڵانیان بردووە.
عەقید محەمەد مەردان وتیشی، تیمێکیان پێکهێناوە و پشکنین بۆ کامێراکانی چاودێری گەڕەکە دەکەن، بۆ ئەوەی سەرەداوێکیان دەستکەوێ و تۆمەتباران بدۆزنەوە.
پێداچوونەوە؛ شۆڕش قادری
دوو "دزی موبایل" لە کەرکوک دەستگیرکران
