"بۆ ئەو پارێزگایانەیە کە هەژارن"

بەتەمای مریشک و هێلکەکەی حکومەتی عێراق بەڕۆژوو مەبن

964+

پێشەوا محەمەد – سلێمانی

ئەو مریشک و هێلکەیەی وەزارەتی بازرگانی عێراق بڕیاریداوە لەمانگی رەمەزاندا لەگەڵ بەشە خۆراکدا دابەشی بکات، هاوڵاتیانی هەرێم ناگرێتەوە.

وەزارەتی بازرگانی عێراق، پێشنیاری کردووە لەمانگی رەمەزاندا لەگەڵ بەشە خۆراکی مانگانەی هاوڵاتیاندا مریشک و هێلکە دابەشبکرێت.

تۆڕی964 لە بەدواداچوونێکدا گەیشتە ئەوەی لەحاڵەتی بڕیاردان و دابەشکردنیشیان هاوڵاتیانی هەرێم ناگرێتەوە.

د.نەرمین مەعروف، پەرلەمانتاری ئەنجومەنی نوێنەرانی عێراق بە تۆڕی964ی راگەیاند: هەر بڕیارێک بۆ بەشە خۆراک بێت دەبێت هاوڵاتیانی هەرێمیش بگرێتەوە، بەڵام لەم دواییانە وەزارەتی بازرگانی چەند بڕیارێکی دەرکردووە و مەرجی بۆ جێبەجێکردنی داناوە.

بە وتەی ئەو پەرلەمانتارە هەرچەندە ئەو دابەشکردنی مریشک و هێلکە نەبووەتە بڕیار  “بەڵام وەزارەتی بازرگانی دەڵێت بۆ ئەو پارێزگایانەیە کە هەژارن، پارێزگاکانی هەرێمیش وەک پارێزگای هەژار تۆمار ناکرێن و مریشک و هێلکەکە نایانگرێتەوە”.

ناوبراو ئاماژەی بەوەشدا، ئەگەر بزانن بڕیارەکە هەرێمی کوردستانیش دەگرێتەوە بەرگریی لێدەکەین.