"پێدەچێت شوێنەکە گۆڕستانی کۆن بێت"
لەکاتی کارکردن لە پڕۆژەی دووسایدی رۆڤیا ئێسک و پروسک دۆزرانەوە
964+
هیڤی دێوالی – دهۆک
لەکاتی کارکردن لە پڕۆژەی دووسایدی سەنتەری ناحیەی رۆڤیا لە پارێزگای دهۆک ئێسک و پروسک و کەلـلەسەری مرۆڤ دۆزرایەوە.
مەنهەل موەفەق بەڕێوەبەری ناحیەی رۆڤیا بە 964ـی وت، “چەند مانگێکە کارکردن لەسەر پڕۆژەی دروستکردنی دووسایدی سەنتەری ناحیەکەمان دەستیپێکردووە و ئەمڕۆ دووشەممە 19.5.2025 لەلایەن کرێکار و ئەندازیاری پڕۆژەکە چەند ئیسک و پروسکێک دۆرزانەوە”.
ئاماژەی بەوەشکرد، ئەگەری زۆر هەیە ئەو شوێنە گۆڕستان بێت و مێژووی گۆڕەکەش بۆ زیاتر لە 60 ساڵ پێش دەگەڕێتەوە.
مەنهەل موەفەق وتیشی، ئەو دەنگۆیانەی لە تۆڕی کومەڵایەتی بڵاوبوونەتەوە و باس لەوەدەکەن کە گۆڕێکی بەکۆمەڵ دۆزراوەتەوە، دوورە لەراستییەوە و تەنیا چەند ئێسکێک دۆزراونەتەوە.
ناحیەی رۆڤیا دەکەوێتە قەزای بەردەڕەش لەسنووری پارێزگای دهۆک، درێژی ئەو دووسایدەی کاری تێدادەکرێت، چوار کیلۆمەترە و بڕی پێنج ملیار و 236 ملیۆن و 317 هەزار دیناریش بۆ پڕۆژەکە تەرخان کراوە.
پێداچوونەوە؛ شۆڕش قادری
