لە چێشتخانەی ئاغاژن ژنان ئاغا و کوێخای خۆیانن

دەشتی عارف ـ هەولێر

لە چێشتخانەی ئاغاژن ژنان ئاغا و کوێخای خۆیانن و هەموو کاروباری چێشتخانەکە بەڕێوەدەبن، تەنیا یەک کارمەندیان کوڕە و زۆربەی خواردنە کوردەوارییەکانیشیان لا دەستدەکەوێ.

گیابەند مستەفا، خاوەنی چێشتخانەی ئاغاژن لە شاری هەولێر، قسەی بۆ 964 کرد و و وتی، “خواردن و دیکۆری چێشتخانەکەم هەمووی کوردەوارییە و ناوی چێشتخانەکەشم هەر لەگەڵ ئەوە گونجاندووە”.

ئاماژەی بەوەشکرد، تەنیا یەک کارمەندی کوڕیان هەیە و ئەویش بەخێرهاتنی موشتەرییەکان دەکات و خواردنیان بۆ دادەنێ و زۆر بە کەمی دەچێتە ناو مەتبەخ.

“بەڕای من خواردنی کوردەواری تایبەتە بە ژنان و دەبێت ژن دروستی بکات، بەدەستی پیاوان ئەو تامە نادات”، گیابەند مستەفا وای وت.

باسی لەوەشکرد کە چێشتخانەکەی بەخت بۆ کارمەندەکانی دەکاتەوە و تا ئێستا چوار کچی بەشووداوە.

محەمەد هێرش یەکێک لە موشتەرییەکانی چێشتخانەی ئاغاژن رەزامەندی خۆی لە خواردنەکان دەربڕی و وتی، “لەوەتی چێشتخانەکە کراوەتەوە دێمە ئێرە، چونکە خواردنەکانی بەتامە و حسابکە لە مارێ نانی دەخۆی”.

پێداچوونەوە؛ شۆڕش قادری