پارێزگاری هەولێر و پارێزگاری قەزوین
پارێزگارەكەیان دێتە هەولێر
هەولێر و قەزوین رێككەوتنێكی سێ خاڵییان واژۆ كرد
964+
ئەرسەلان عەبدوڵا
هەردوو پارێزگای هەولێر و قەزوینی ئێران رێككەوتنێكیان لە بوارەكانی وەبەرهێنان، بازرگانی و پیشەسازی و كشتوكاڵی و چەند بابەتێكی دیكە واژۆ كرد، پارێزگاری قەزوینیش داوەتی هەولێر كراوە و بڕیارە بێت.
شاندێكی پارێزگای هەولێر بە سەرۆكایەتی ئومێد خۆشناو سێ رۆژە لە كۆماری ئیسلامیی ئێرانن و تا ئێستا دوو رێككەوتنیان لەگەڵ پارێزگاكانی تاران و قەزوین واژۆ كردووە، كە زیاتر رێككەوتنەكان لە بارەی بازرگانی و پەرەپێدانی پەیوەندییە ئابوورییەكانە.
دوای یاداشتی لەیەكگەیشتن لەگەڵ پارێزگای تاران، ئێوارەی سێشەممە ئومێد خۆشناو و شاندەكەی سەردانی شاری قەزوینیان كرد و لەوێش بازاڕی قەیسەری و شوێنە كولتوورییەكانیان بەسەركردەوە، دواتریش رێككەوتنێكیان لەگەڵ ئیدارەی پارێزگای شارەكە واژۆ كرد.
دەقی رێككەوتنەكە، وەك راگەیاندنی پارێزگای هەولێر ئەمڕۆ بڵاویكردووەتەوە، بەم جۆرەیە:
مادەی یەکەم:
هەردوولا رێوشوێنی پێویست دەگرنەبەر بۆ ئاسانکاری وەبەرهێنان، ئەنجامدانی بازرگانی، پێشوازیی و ناردنی شاندیی بازرگانی، گواستنەوەی تەکنەلۆژیا، هاوکاریکردن لە پەرەپێدانی بازاڕی کەرتی تایبەت، و ڕێکخستنی پێشانگای هاوبەشی هەردوولا.
مادەی دووەم:
هەردوولا رێککەوتن لەسەر لێکۆڵینەوە و دیراسەکردن لە ئەگەری دامەزراندنی شارۆچکە تایبەتمەندەکان لە بوارەکانی پیشەسازیی، بازرگانی، کشتوکاڵ، گەشتیاری، تەندروستی لە هەردوو پارێزگاکەدا.
مادەی سێیەم:
رێککەوتن کرا کە کۆبوونەوەکانی نێوان هەردوولا بەردەوام بن بۆ تاوتوێکردنی چۆنیەتی بەردەوامیدان بە هاوکارییەکان و خستنەڕووی نەخشەڕێگایەک لە هەردوو پارێزگاکەدا.
