بازرگانانی هەولێر داوەتی پێشانگای نێودەوڵەتی غازی عەنتابن

964+

ئەرسەلان عەبدوڵا

پێشانگایەكی خۆراک لە ئاستی رۆژهەڵاتی ناوەڕاست لە شاری غازی عەنتاب لە تورکیا دەكرێتەوە، بازرگان و خاوەن كارانی هەولێریش دەتوانن بەشداربن و تەنانەت خەرجی مانەوە و هاتوچۆشیان لە ئەستۆی پێشانگەكە دەبێت.

كامەران محەمەد ساڵح ئەندامی ئەنجومەنی ژووری بازرگانی و پیشەسازیی هەولێر ئەمڕۆ چوارشەممە 30.4.2025 بە 964ی راگەیاند، پێشانگەكەی غازی عەنتاب بۆ خۆراكە و لە رۆژانی 7 تا 9.5.2025 بەڕێوەدەچێت.

وتیشی، وەك ژوور بازرگانیی هەولێر ئاگاداری بازرگانان، خاوەن کۆمپانیا و خاوەنکارانی ئەندام لە ژوورەکەمان (لە هەمان سێکتەری پێشانگا) دەکەینەوە، ئەوانەی خوازیارن بەشداربن لەم پێشانگایە، سەردانی ژووری بازرگانی و پیشەسازی هەولێر، بەشی پەیوەندیەکان بکەن بۆ ئەوەی كارئاسانییان بۆ بكەین.

“رێکخستنی گەشتی چوون و گەڕانەوە، مانەوەی سێ رۆژ لە هۆتێل و خزمەتگوزاری گواستنەوە بۆ پێشانگا و گەڕانەوە، هەمووی لەسەر ئەستۆی رێکخەری پێشانگاکە دەبێت”، كامەران محەمەد ساڵح وای وت.

هەروەها ئەوەشی خستەڕوو، دوایین کات بۆ پێشکەشکردنی داواكاری رۆژی 4.5.2025 دەبێت.

پەیوەندییە بارزگانییەكانی نێوان هەرێمی كوردستان و عێراق لەگەڵ توركیا لە برەوپێدانی بەردەوامدایە، ئەمڕۆ لە بەغداش دووەم رۆژی دیداری بازرگانانی بیناسازیی عێراق و توركیا بەڕێوەدەچێت.

هەروەها لە رۆژانی رابردوو کامەران سەڵاح باجگر، جێگری سەرۆکی ژووری بازرگانی و پیشەسازی هەولێر، بەشداری لە کۆڕبەندی پالادیۆمی ئابووری كرد لە شاری ئەرزەڕومی توركیا.

بەپێی زانیاریی میدیا عێراقییەكان، ئاستی ئاڵوگۆڕی بازرگانیی نێوان عێراق و توركیا 15 ملیار دۆلار بوو لە ساڵی 2024.