تای خوێنبەربوون
لە گوندەکانەوە دەستپێدەکەن
گەرمیان خۆی بۆ رووبەرووبوونەوەی تای خوێنبەربوون ئامادە دەکات
964+
میلاد جەلال – گەرمیان
بۆ رێگریکردن لە تای خوێنبەربوون، ڤێتێرنەری گەرمیان ھەڵمەتی شۆردنی ئاژەڵەکان و تەعقیمکردنی جێگای بەخێوکردنی ئاژەڵەکان دەستپێدەکات، بەڕێوەبەری ڤێتێرنەریش دەڵێت، لە گوندەکانەوە دەستپێدەکەن.
ئاریان ئیبراھیم، بەڕێوەبەری ڤێتێرنەری گەرمیان بە 964ـی وت، “لە سنووری گەرمیان تا ئێستا ھیچ حاڵەتێکی تای خوێنبەربوون تۆمارنەکراوە و ھیچ حاڵەتێکی گوماناویش نەبووە”.
“رۆژی یەک شەممە لە رێگەی تیمەکانمانەوە دەستدەکەین بە شۆردنی ئاژەڵەکان و رشاندنی دەرمان بە جێگای ئاژەڵەکان، لە رێگەی حەوت بنکەی ڤێتێرنەریەوە ھەڵمەتەکە ئەنجام دەدەین، قەسابخانەکانی ناو شارمان تەعقیم کردووە و دەڕۆینە گوندەکان”،ئاریان ئیبراھیم وای وت.
ئاماژەی بەھەشکرد،”ھەموو دەرمان و پێداویستیەکانی ھەڵمەتەکەمان ئامادەیە و لەلایەن وەزارەتی کشتوکاڵەوە بۆمان دابینکراوە، بۆ رێگری کردن لە تای خوێنبەربوون”.
دکتۆر سیروان محەمەد، بەڕێوەبەری تەندروستی گەرمیان بە 964ـی وت، لەگەڵ ڤێتێرنەری گەرمیان ئامادەکاری تەواومان کردووە بۆ رووبەڕووبونەوەی نەخۆشیەکە.
پێداچوونەوە: توانا نەقی
