خولی شارەزابوون و خۆپارێزی بۆ حاجیانی كوردستان دەكرێتەوە

964+

ئەرسەلان عەبدوڵا

وتەبێژی بەڕێوەبەرایەتیی حەج و عومرەی كوردستان ئاشكرای كرد، ئەو كەسانەی ئەمساڵ ناویان بۆ ئەنجامدانی فەریزەی حەج دەرچووە، خولی شارەزایی و وەرگرتنی رێنمایی حەجیان بۆ دەكرێتەوە.

كاروان ستوونی ئەمڕۆ پێنجشەممە 3.4.2025 بە تۆڕی 964ی راگەیاند، لە 16ی ئەم مانگەوە تا 26ی مانگ، بۆ ماوەی 10 رۆژ خولی رێنماییكردن و شارەزابوون لە ئەنجامدانی فەریزەی حەج بۆ ئەو كەسانە دەكرێتەوە، كە ئەمساڵ ناویان بۆ ئەنجامدانی فەریزەی حەج هاتووەتەوە.

وتیشی، خولەكە بە شێوەی پراكتیكی دەبێت و تێیدا ئەوانەی سەفەری حەج دەكەن، لە چۆنیەتی ئەنجامدانی فەریزەكە، هەڵسوكەوت لە فڕۆكەخانە و ناو شوێنە پیرۆزەكان، هەروەها چۆنیەتیی خۆپاراستن لە نەخۆشی و قەرەبالغی و چەند بابەتێكی دیكەی پەیوەست بە پرۆسەی حەجكردن دەكرێن”.

هەروەها روونیكردەوە، خولەكە بە هەماهەنگی لەگەڵ وەزارەتی تەندروستی دەبێت، بە تایبەتی بۆ لایەنی خۆپاراستنی تەندروستی و زۆر تایبەتیش بۆ ئەوانەی نەخۆشیی درێژخایەنیان هەیە.

كاروان ستوونی ئاشكرای كرد، لە رێگەی هەر هەشت نووسینگەكانی بەڕێوەبەرایەتیی حەج و عومرە لە شار و ئیدارە سەربەخۆكانی كوردستان، خولەكان بەڕێوەدەچن و هەر هاوڵاتییەك لە شاری خۆیەوە بەشداریی خولەكە دەكات.

بۆ وەرزی ئەمساڵی حەج، ناوی پێنج هەزار و 190 كەس لە هەرێمی كوردستان گەڕاوەتەوە و بڕیارە فەریزەی حەج ئەنجام بدەن.