دیمهنێكی كه‌نگر كه دهردهكهوێت له ره‌گه‌وه ههڵكێشراون... وێنه: سۆشیاڵ میدیاى گوندی ئێندزه.
شاره‌وانى "به توندى سزایان ده‌ده‌ین"
گونده‌كانى بنارى قه‌ندیل ئاگادارى هاوڵاتیان ده‌كه‌نه‌وه گیابه‌هارییه‌كان له ره‌گه‌وه هه‌ڵنه‌كێشن
964+
فه‌رهاد حه‌سه‌ن
وه‌رزى به‌هار ده‌ستپێكردووه و گونده‌كانى بنارى قه‌ندیلیش هاواریان لێهه‌ستاوه به‌ده‌ست ئه‌و كه‌سانه‌ى بۆ كردنى گیاى به‌هاره سه‌ردانى ئه‌م بناره ده‌كه‌ن، بۆ ئه‌مساڵیش هاوڵاتیان داوا ده‌كه‌ن رێگرى بكرێت له‌م جۆره كه‌سانه‌ى كه گیاى به‌هاره له‌ڕه‌گه‌وه هه‌ڵده‌كێشن.
هاوڵاتیانى به‌شێك له‌م گوندانه له بانگه‌وازێكدا كه وێنه‌یه‌كیان بۆ 964 ناردووه، داواى پاراستنى گیاى به‌هاره له سنووره‌كه‌یان ده‌كه‌ن و چونكه ده‌ڵێن، ئەم شێوازی هەڵکێشانی گیایه كه ئه‌نجامده‌درێت زوڵمێکە لە سروشت و لە ئێمه و لە نه‌وه‌ی داهاتوشی دەکەن.
داواشیان كردووه به‌هه‌موو شێوه‌یه‌ك رێگرى بكرێت له‌و كه‌سانه‌ى دێنه گونده‌كانى بنارى قه‌ندیل و تۆوى كه‌نگر ده‌بنه‌وه و ده‌ڵێن “ئەمساڵ بەهیچ شێوەیەک لێیان قبوڵ ناکرێت”
خه‌ڵكه‌كه به پێویستى ده‌زانن، بە یاسا رێگری لە هەڵتەکاندنی گیاکان بکرێت و ئەرکی شارەوانی بناری قەندیل و ئاسایشی راپەڕین و ئەنجومەنی گوندەکان و ئەو کەسانەشە کە وەک لیژنەی گوند ناسراون گرنگی تەواو بەو بابەتانە بدەن.
لای خۆشییه‌وه، دڵشێر ئیبراهیم، هاوسه‌رۆكى شاره‌وانیى بنارى قه‌ندێل (كه شاره‌وانییه‌كه‌ى سه‌ر به حكومه‌تى هه‌رێم نییه و له په‌كه‌كه‌وه نزیكه) به 964ـى وت، خه‌ڵكه‌كه ئه‌و داواكارییه‌یان كردووه و به مافى ئه‌وانى ده‌زانن.
وتیشی “ئه‌وه‌ى تێبینیمان كردبێت ئه‌و خه‌ڵكانه‌ى بۆ گیاى به‌هاره دێنه بنارى قه‌ندیل له ناوچه‌كانى گه‌رمیان و سلێمانى و راپه‌ڕینه‌وه دێن و به‌شێكیان هۆكارن بۆ له‌ناوچوونى گژوگیاكه”.
“هه‌ر كه‌سێك ببیندرێت گیا له ره‌گه‌وه هه‌ڵبكێشێت، لێپرسینه‌وه‌ى توندى له‌گه‌ڵدا ده‌كه‌ین” ئه‌مه‌ش قسه‌ى هاوسه‌رۆكی شاره‌وانى بنارى قه‌ندیله.
ژینگه‌ى سۆران له‌سه‌ر گرته ڤیدیۆیه‌ك هاته‌ده‌نگ كه به كۆمه‌ڵ گیاى به‌هاره‌یان كردووه
بنارى قه‌ندیل گژوگیاى به‌هاره له خه‌ڵكی ده‌ره‌وه‌ى بناره‌كه قه‌ده‌غه ده‌كات
له بارزان بازرگانیكردن به گوڵ و گیاى به‌هاره قه‌ده‌غه‌كرا
