ئاوى پاک بۆ 65%ـى دانیشتوان دابین دەکات
دەورووبەرى پڕۆژەى ئاوى قولەى رانیە پیس بووە
964+
رێباز عەزیز- رانیە
پڕۆژەى ئاوى قولەى رانیە کە ئاوى پاک و خاوێن بۆ 65%ـى دانیشتوانى رانیە دابین دەکات، بەهۆى پیسبوونى و فڕێدانى پاشماوەکان لە دەورووبەرى پڕۆژەکە، مەترسى لەسەر پیسبوونى ئاوەکەى دروستکردووە.
لە رێگەی پڕۆژە ئاوی قولەوە رۆژانە دوو هەزار مەتر سێجا ئاوی خاوێن دەنێرین بۆ هاوڵاتیانى رانیە
پاشماوەکان لە دەورووبەرى پڕۆژەکەى ئاوى قولە فڕێدەدرێن، جگە لە پیشاندانى دیمەنێکى ناشیرین، مەترسى بۆسەر ئاوى پڕۆژەکەش هەیە
ئاسۆ ئیبراهیم، لێپرسراوی پڕۆژە ئاوی قولەی رانیە بە 964ـی وت،”دەبینین رۆژانە دەورووبەری پڕۆژەکە بە پاشماوە پیسى لێ فڕێدەدرێت، بەڵام ئەو شوێنانەى پاشماوەکانى لێ فڕێدەدرێن لە ناو پڕۆژەکەى ئاوى قولە نین”.
بە وتەى ئاسۆ ئیبراهیم، چەندین جار داوایان کردووە ئەو بەشە بخرێتە سەر پڕۆژەکە بۆ ئەوەى بتوانن تەلبەندى بکەن و بیپارێزن و لە رێگەى فڕێدانى پاشماوەکانیشەوە مەترسى لەسەر پڕۆژەکە دروست نەبێت.
لاى خۆیەوە، بەرهەم رەسوڵ، سەرۆکى شەرەوانى رانیە قسەى بۆ 964 کردووە و بەقسەى ئەو بێت، ئەو شوێنە رووبەرەکەى 150 مەترە و پێشتر نوسراویان بۆکردوون بۆ ئەوەى بخرێتە سەر پڕۆژەکە، ئەوانیش رەزامەندیان داوە، بەڵام وەک دەڵێت،”نەهاتوون بەدەم کارەکەیانە و نەیانخستووەتە سەر پڕۆژەکە”.
