"بەردەوام پاک دەکرێتەوە"
رێگای مەرزی کێلێ تائێستا کراوەیە و نەگیراوە
964+
شۆڕش قادری
دوای ئەم شەپۆلە بەفر و بارانەی رووی لە ناوچەکانی کوردستان کردووە، تیمەکانی رێگاوبانی راپەڕین سەرقاڵی پاکککردنەوەی مەرزی کێلێـن و تا ئێستا رێگای مەرزەکە نەگیراوە.
عەباس عەزیز بەڕێوەبەری گومرگی راپەڕین بە 964ـی وت، “لە شەوی رابردووەوە بەفر دەستی بە دابارین کردووە لە ناوچە بەرزەکانی دەڤەری راپەڕین و بەفرێکی باش لە رێگای مەرزی کێلێ و چەند شوێنێکی دیکە باریوە”.
“هەرچەندە ئەمڕۆ هەینی و پشووە و هاتوچۆ لە مەرزی کێلێ ناکرێت، بەڵام رێگاکە بەردەوام ئامێری لەسەرە و پاک دەکرێتەوە، بۆیە تا ئێستا رێگاکە نەگیراوە”، عەباس عەزیز وای وت.
ئاماژەی بەوەشکرد، تیمەکانی رێگاوبانی راپەڕین بەردەوام لەسەر رێگاکەن و پاکی دەکەنەوە، مەگەر ئەمشەو بەفرێکی زۆر ببارێ، ئەگەرنا بۆ بەیانیش رێگاکە کراوە دەبێت و هاتوچۆ لە مەرزەکە ئاسایی دەبێت.
لە زستانی ئەمساڵدا و بەهۆى بەفربارینەوە ، چەند جارێک رێگای مەرزی کێلێ گیراوە و هاتوچۆ تیایدا راگیراوە.
مەرزى کێلێ، مەرزێکى نافەرمییە لە نێوان هەرێمى کوردستان و وڵاتى ئێران، بە دیاریکراوى لە دیوى هەرێمى کوردستان دەکەوێتە سنوورى قەزاى پشدەر و لە دیوى رۆژهەڵاتى کوردستانیشەوە نزیکترین شار لێیەوە سەردەشتە.
دوای دوو رۆژ رێگای مەرزی کێلێ کرایەوە
