هندستانیش ساڕێژی برینی بەرکەوتووانی چەکی کیمیایی هەڵەبجە دەکات

شۆڕش قادری

وڵاتی هندستانیش هاتە ریزی ئەو وڵاتانەی ساڕێژی برینی بەرکەوتووانی چەکی کیمیایی هەڵەبجە دەکەن و بۆ یەکەمجار زیاتر لە یەک تۆن دەرمان و پێداویستی پزیشکی پێشکەشی نەخۆشخانەی بەرکەوتووانی چەکی کیمیایی لەو پارێزگایە کرد.

ئازاد مستەفا بەڕێوەبەری گشتیی تەندروستی هەڵەبجە بە 964ـی وت، “ئەمڕۆ دووشەممە 10.2.2025 سۆومێن باکچی باڵیۆزی هیندستان لە عێراق و کونسوڵی ئەو وڵاتە لە هەرێمی کوردستان سەردانی هەڵەبجەیان کردووە و نەخۆشخانەی بەرکەوتووانی چەکی کیماییان بەسەرکردووەتەوە”.

بەقسەی ئازاد مستەفا، باڵیۆز و کونسوڵی هیندستان زیاتر لە یەک تۆن دەرمانی و پێداویستی پزیشکیان داوەتە نەخۆشخانەکە و پشتیوانی خۆیان دووپاتکردووەتەوە.

ئاشکراشیکرد، دەرمانەکان پەمپی دژە هەناسەتوندی و قەترەی دژی وشکبوونی قوڕگ و دەم و ئامێرێکی هەناسەدانی دەستکردی پۆرتەبڵیان تێدایە.

پێشتریش فەڕەنسا و چەند وڵاتێکی دیکە هاوکارییان گەیاندووەتە نەخۆشخانەی بەرکەوتووانی چەکی کیمیایی لە هەڵەبجە.