سەرۆکی عێراق داوای لە ناتۆ كرد توانای هێزە عێراقییەكان بەرزبكاتەوە

964+
ئەحمەد مستەفا

سەرۆكی عێراق، بە ئەمینداری گشتی هاوپەیمانی ناتۆی وت، توانیوویانە پاشماوەکانی رێکخراوی چەکداری داعش لە عێراق لەناوببەن و داوای كرد، ناتۆ، ئاسۆ هاریکاری فراوان بکات بۆ توانا سەربازییەکانی هێزە ئەمنییەکان.

ئەمڕۆ لەتیف رەشید، سەرۆک کۆماری عێراق و مارک روتە، سکرتێری گشتی هاوپەیمانی ناتۆ لە بەغدا یەکیان بینی، بە گوێرەی راگەیەندراوی کۆبوونەوەکە کە 964 بینوویەتی، کەیسی هاریکاری دوو قۆڵی، بۆ راوێژ و بەشداریکردن لەبنیاتنانەوە و پەرەپێدانی توانا سەربازییەکانی هێزە ئەمنییەکانی عێراق تاوتوێ کراوە.

سەرۆک عێراق وتوویەتی، عێراق دۆخە سەختەکانی جەنگی تیرۆری تێپەڕاند و هێزە ئەمنییەکانی عێراق توانیویانە چەکدارانی داعش و پاشماوەکانیان لەناوببەن، ئێستاش ئامادەیی و توانای رووبەڕوبوونەوەی ئاستەنگە ئەمنییە جیاوازەکانیان هەیە و ئەمڕۆ عێراق سەقامگیری ئەمنی و ئابووری بەخۆوە دەبینێت.

هەروەها، مارک روتە، دووپاتی پەرۆشی نوێنەرایەتی ناتۆی کردووەتەوە بۆ بەهێزکردنی پەیوەندییەکان و هاوکاری دوو قۆڵی لەبواری مەشق و راوێژکاری و ئاڵوگۆڕی زانیاری بەشێوەیەک کەتوانای هێزە چەکدارەکانی عێراق بەسەرجەم پێکهاتەکانیەوە بەرز بکاتەوە، ئەوەش بە گوێرەی هەمان راگەیەندراو.

دیمەنێک لە کۆبوونەوەی سەرۆک کۆماری عێراق و سکرتێری ناتۆ؛