سەرۆكی حكومەتی هەرێم ئامێرەكانی پێشانگەی تەندروستی تاقیكردەوە

ئەرسەلان عەبدوڵا

لە هەولێر پێشانگەیەكی نێودەوڵەتیی تەندروستی كرایەوە و سەرۆكی حكومەتیش ئامادەی بوو، ئامێرەكانیشی تاقیكردەوە.

پێشانگەی نێودەوڵەتیی تەندروستی  MEDICلە پێشانگەی نێودەوڵەتی هەولێر لە پاركی سامی عەبدولڕەحمان، ئەمڕۆ چوارشەممە كرایەوە و یەكەمین و گەورەترین پێشانگەی نێودەوڵەتی تەندروستییە لە عێراق و کوردستان.

سەرۆکی حکومەتی هەرێم مەسرور بارزانی خۆی پێشانگەكەی كردەوە و بەشەکانی پێشانگاکەی بەسەرکردەوە، هەروەها هەندێك لە ئامێرەكانی تاقیكردەوە.

پەیامنێری 964 لە پێشانگەكە ئامادەبوو، ئاماژەی بەوەدا، 150 کۆمپانیای ناوخۆیی و نێودەوڵەتی بەشداریان تێدا کردووە و پێشانگەكە تا هەشتی ئەم مانگە بەردەوام دەبێت.

هەروەها ئەوەی خستەڕوو، كە لە پێشانگەكەدا ئامێر و پێداویستی و كەلوپەلی بوارە جیاجیاكانی تەندروستی نمایش كراوە و هەندێك كەلوپەلی نوێ و تازەی بواری نەشتەرگەری و نەخۆشخانەكان لە پێشانگەكە نمایش كراوە.