بەفرین مەحموودی، فۆتۆ: رێكخراوی هەنگاو
چارەنووسی نادیارە
ژنێکی کورد لە بۆکان دەستبەسەر کرا
964+
ئەرسەلان عەبدوڵا
بەفرین مەحموودی، كە هاوڵاتییەکی کوردی خەڵکی شاری بۆکانی رۆژهەڵاتی كوردستانە، لە لایەن هێزە ئەمنییەکانی کۆماری ئیسلامیی ئێرانەوە لە شارەكەی خۆیدا دەستبەسەر كراوە و بۆ شوێنێکی نادیار گواستراوەتەوە.
رێكخراوی هەنگاو بۆ مافی مرۆڤ بڵاویكردەوە، بە پێی ئەو راپۆرتانەی پێیانگەیشتووە، لە پێنجشەممەی رابردووەوە بەفرین مەحموودی، هاوڵاتیی خەڵکی بۆکان لە ئەنجامی هێرشی هێزە ئەمنییەکان بۆ سەر ماڵەکەی و بە بێ نیشاندانی هیچ بەڵگەیەکی دادوەری، دەستبەسەر كراوە و بۆ شوێنێکی نادیار گواسترایەوە.
بە وتەی سەرچاوەیەکی ئاگادار، كە بە رێكخراوەكەی راگەیاندووە، بەدواداچوونەکانی بنەماڵەی ئەم هاوڵاتییە بە مەبەستی ئاگاداربوون لە چارەنووس و بارودۆخی ژنەكە، تا ئێستا بێ ئاکام ماوەتەوە.
سەرچاوەكە باسی ئەوەی نەكردووە بەفرین مەحموودی چ كارەیە، بەڵام دەڵێت، تا ئێستا هیچ زانیارییەکی وردیان لەسەر هۆکاری دەستبەسەرکردن، تۆمەتە سەپێندراوەکان و شوێنی راگرتن و چارەنووسی ئەو ژنەیان دەستنەكەوتووە.
