رێگاوبانی هەولێر تەنیشتەکانی پردە گەورەکان پاک دەکاتەوە - وێنە: پارێزگای هەولێر
لەترسی لافاو و ئاستەنگی هاتوچۆ
رێگاوبانی هەولێر تەنیشتەکانی پردە گەورەکان پاک دەکاتەوە
شۆڕش قادری
بەمەبەستی رێگەگرتن لە دروستبوونی لافاو و ئاستەنگی هاتوچۆ، رێگاوبانی هەولێر دەستیکرد بە پاککردنەوەی تەنیشتی پردە گەورەکان.
رزگار عەبدولکەریم لێپرسراوی راگەیاندنی بەڕێوەبەرایەتی چاککردنەوە و پاراستنی رێگاوبانی هەولێر بە 964ـی وت، “ئەمڕۆ سێشەممە 28.1.2025 لەپێناو خزمەتکردنى زیاترى هاوڵاتیان و بە ئامانجی باشترکردنی رێگاوبان و کەمکردنەوەی ئاستەنگی هاتوچۆ، دەستکرا بە پاککردنەوە و ڕێکخستنەوەی تەنیشتەکانى پردی بەستۆڕە لە رێگای هەولێر – پیرمام”.
“تەواوی خۆل و پاشماوەی باران و زبل و خاشاکی ئەو شوێنە، لەلایەن تیمەکانمان لابراوە و ئەو کارەش رێگە لە دروستبوونی لافاو و ئاستەنگی هاتوچۆ لەکاتی بارانبارین لە داهاتوو دەگرێت”، رزگار عەبدولکەریم وای وت.
ئاماژەی بەوەشکرد، تەنیشت و ژێری سەرجەم پردەکانی دەورووبەری هەولێر پاک دەکەنەوە کە نزیکەی 40 پرد دەبن.
