هاتوچۆى پەکى کەوت
بەفر مەرزى کێلێى داپۆشى
964+
وریا فەتاح
شەوى رابردوو، زیاتر لە 20 سانتیمەتر بەفر لە سنوورى مەرزى کێلێ باریوە، بەهۆیەوە رێگاى گەیشتن بە مەرزەکە پەکى کەوتووە و چاوەڕێ ناکرێت ئەمڕۆ بکرێتەوە.
عەباس عەزیز باپیر، بەڕێوەبەرى گومرگى راپەڕین بە 964ـى وت،” تا کاتژمێر 3ـى بەرەبەیانى ئەمڕۆ زیاتر لە 10 سانتیمەتر بەفر لە مەرزى کێلێ باریبوو و ئەم بەیانییە گەیشتووە بە 20 سانتیمەتر، بەهۆیەوە هاتوچۆکردن پەکى کەوتووە”.
وەک باسى دەکات، بەهۆى ئەوەى ئامێریان نییە بۆ پاککردنەوەى رێگاکە، لە شەوى رابردووەوە لەسەرهێڵن بۆ ئەوەى ئامێرى پێویست بنێردرێت و رێگاکە لە بەفر پاکبکرێتەوە، بەڵام وەک دەڵێت، هیچ نەکراوە.
عەباس عەزیو وتیشى،”پێناچێت ئەمڕۆ بتوانن رێگاکە بکەنەوە، بەهۆیەوە هاتوچۆکردن بۆ مەرزى کێلێ پەکى کەوتووە”.
مەرزى کێلێ، مەرزێکى نافەرمییە لە نێوان هەرێمى کوردستان و وڵاتى ئێران، بە دیاریکراوى لە دیوى هەرێمى کوردستان دەکەوێتە سنوورى قەزاى پشدەر و لە دیوى رۆژهەڵاتى کوردستانیشەوە نزیکترین شار لێیەوە سەردەشتە.
