پلانی كاری ساڵی نوێ لە لایەن شارەوانیی هەولێرەوە چییە؟

964+

ئەرسەلان عەبدوڵا

سەرۆكی شارەوانیی هەولێر دەڵێت لە ساڵی نوێدا كۆمەڵێك كار و پڕۆژەیان لە بەرنامەدایە، لەوانەش درێژەدان بە خزمەتگوزاری و كەمكردنەوەی رۆتین و هەروەها بەئەلیكترۆنیكردنی نووسراوەكانیان.

كارزان عەبدولهادی ئەمڕۆ یەكشەممە 5.1.2025 بە تۆڕی 964ی راگەیاند، لەگەڵ دەستپێكردنەوەی دەوام و ساڵی نوێ، كۆبوونەوەیەكی بەرفراوانی لەگەڵ بەڕێوەبەری هەر نۆ بەڕێوەبەرایەتی سەر بە شارەوانیی هەولێر و بەڕێوەبەرانی دیكەی شارەوانی ئەنجامداوە و بەشێك لە پلان و بەرنامەی ساڵی نوێیان خستووەتە بەرباس.

وتیشی، بۆ ئەمساڵیش كۆمەڵێك پلان و بەرنامە و ستراتیژیان هەیە و كاری لەسەر دەكەن، كە بەشێكیان ئەمانەن:

1 – پلانی نوێی کار و پڕۆژەکان لە گشت سێکتەرەکان

2- کەمکردنەوەی رۆتین و کارئاسانی بۆ داخوازی و مامەڵەکانی هاوڵاتیان

3- رێکخستنەوەی شەقامە گشتییەکان و بەدواداچوونی فلکە و سوڕانەوەکان “یوتێرنەكان” لە پێناو کەمکردنەوەی جەنجاڵیی هاتوچۆی شۆفێران .

4-  زیادکردنی رێژەی سەوزایی و بایەخدان بە نەمامگە ناوخۆییەکان و سەوزکردنی دوورگە ناوەندییەکان

5- گرنگیدان بە پاکوخاوێنی زیاتری شار و بەردەوامی کۆکردنەوەی زبڵ و خاشاک لە تەواوی شاری هەولێر

6-  رێکخستنەوەی بازاڕ و شۆستە و شەقامەکان لە زێدەڕۆیی و ناڕێکی سیمای شار

7-  پەرەپێدانی زیاتر به قیرتاوکردن و چاککردنەوەی چاڵ و شکستەکانی شەقام و کۆڵانەکان

8- بایەخدان بە پارک و باخچەکانی شاری هەولێر، زیادکردنی باخچەی گەڕەکەكان لە خزمەتی هاوڵاتیان

لە ساڵی 2024 زیاتر لە 80 هەزار نووسراو لە شارەوانیی هەولێر دەرچووە و هاتووە

سەرۆكی شارەوانیی هەولێر ئەوەی بۆ 964 ئاشكرا كرد، لە ساڵی 2024 زیاتر لە 80 هەزار نووسراو لە شارەوانیی هەولێر دەرچووە و هاتووە، بۆیە پلانی سەرەكییان ئەوەیە ئەمساڵ نووسراوەكان بكەن بە ئەلیكترۆنی و كارەكان ئاسانتر بكەن.

ئاماژەی بەوەش دا، بەبێ جیاوازی كار بۆ شاری هەولێر دەكەن و لە هەر شوێنێك پێویست بێت، بە پێی توانای خۆیان كاری نۆژەنكردنەوە و خزمەتگوزاری بۆ دەكەن.

داهاتی شارەوانی هەولێر لە ساڵی رابردوودا زیاتر لە 15 ملیار دینار بووە