یەكێك لە بەتەمەنترین درەختەکان لە هەرێمی کوردستان بڕایەوە - وێنە: پۆلیسی دارستان و ژینگەی سلێمانی
"تەمەنی زیاتر لە 200 ساڵ بوو"
یەكێك لە بەتەمەنترین درەختەکان لە هەرێمی کوردستان بڕایەوە
964+
شۆڕش قادری
لە سنووری بەرزنجەی سەر بە پارێزگای سلێمانی، هاوڵاتییەك دارێکی باڵابەرزی بڕییەوە، کە تەمەنی زیاتر لە 200 ساڵ بوو، نەشونمای دەکرد و دیمەنێکی دڵڕفێنی بە ناوچەکە بەخشیبوو، بەڵام ئەم كارە بێ سزا تێنەپەڕی و كابرا دەستگیر کرا و سزاش دەدرێت.
هێمن کەمەرخان وتەبێژی پۆلیسی دارستان و ژینگەی سلێمانی بە 964ـی وت، “دوای ئەوەی مەفرەزەیەكی بەشی پۆلیسی دارستانی بەرزنجە زانیاریان پێگەیشت، دارێکی سروشتی تەمەن گەورە، کە تەمەنی زیاتر لە 200 ساڵ دەبێت، بڕاوەتەوە، دەستکرا بە لێکۆڵینەوە و بەدواداچوون، لە ئەنجامدا هاوڵاتییەك بە تۆمەتی بڕینی دارەکە دەستگیر کرا و هەروەها دەست بەسەر ماتۆڕسکیلێكیشدا گیرا”.
ئاشکراشی کرد، تۆمەتبار بە بڕیاری دادوەر بەندە و پەڕاوی لێکۆڵینەوە لەوبارەیەوە کراوەتەوە.
هێمن کەمەرخان وتیشی، “بەدڵنیاییەوە سزای ئەو کەسە قورستر دەبێت لە سزای ئەو کەسانەی کە داری ئاسایی دەبڕنەوە و لە یەک دوو رۆژی داهاتوودا زانیاری زیاتر لەوبارەیەوە بڵاودەکەینەوە”.
ئاماژەی بەوەش کرد، سروشت و ژینگەیەکی پاك و دروست یەکێکە لەو رەگەزانەی کە راستەوخۆ پەیوەندی بە تەندروستی مرۆڤەوە هەیە، لە پێناو بنیادنان و دروستکردنی ژینگەیەكی تەندروست پێویستە هەموومان بە گیانێکی بەرپرسیارانەوە مامەڵەی لەگەڵدا بکەین، لەو چوارچێوەیەشدا هێزەکانیان لە سەرجەم سنورەکان، هەمیشە لە ئەرك و هەوڵەکانیان بەردەوام دەبن و مەفرەزەکانیان رێگری لە سەرپێچیکاران و دوژمنانی ژینگە دەکەن و پاراستنی سروشت و ژینگە لە پێشینەی کارەکانیانە.