تەقینەوەی بالۆنەكانی ئارایشتگاكەی هەولێر بێ زیان بوو

دەشتی عارف

ئەو ئاگرەی لە ئەنجامی تەقینەوەی بالۆنی جوانكاری لە بەردەم ئارایشتگایەكی خانمان لە هەولێر روویدا، هیچ زیانێكی نەبوو، ئەمڕۆش دەستیان بە كار كردووەتەوە.

ئارایشتگای دانێلا بەبۆنەی رۆژی ئاڵای كوردستان و هاوكات زیادبوونی فۆلۆوەرزەكانیان لەسەر سۆشیال میدیا، دوێنێ ئێوارە ئاهەنگێكیان لە بەردەم ئارایشتگاكەیان ئەنجام دا، بەڵام ئەو بالۆنانەی بۆ ئاهەنگەكە ئامادەكرابوون و شوێنەكەیان پێ رازاندبووەوە، لەناكاو تەقینەوە و بڵێسەیەكی گەورەی ئاگریان لێ هەڵسا، كە ڤیدیۆیەكی كورتی رووداوەكە لە پەیجی 964 دانراوە.

ئەمڕۆ چوارشەممە 18.12.2024 پەیامنێری 964 سەردانی ئارایشتگاكەی كرد و ویستی لەگەڵ خاوەنەكەی یان كارمەندەكان قسە بكات، بەڵام ئەوان داوای لێبوردنیان كرد و ئامادەنەبوون لە بەردەم كامێرای 964 دەركەون، بەڵام ئەوەیان وت، كە هەموو ئەوانەی لە ئاهەنگەكە ئامادەبوون، سەلامەتن و كەس هیچی بەسەر نەهاتووە،

هەروەها ئەوەیان باس كرد، ئاگرەكە رێك لە كاتژمێر 3:43 خولەكی ئێوارە روویداوە و بالۆنەكان بەبێ هیچ هۆكارێكی دیاریكراو تەقیونەتەوە.

بەپێی زانیارییەكانی 964 پۆلیس لێكۆڵینەوەی لە رووداوەكە كردووە و كامێرای چاودێریی شوێنەكەیان وەرگرتووە، بۆ ئەوەی بگەنە هۆكاری روودانی ئاگرەكە.

پێداچوونەوە: ئەرسەلان عەبدوڵا