وەزیری ناوخۆی بەریتانیا لەسەر قەڵای هەولێرەوە:
“هاوبەشیمان دەگەڕێتەوە بۆ چەندین ساڵ پێش ئێستا”
964+
ئەرسەلان عەبدوڵا
وەزیری ناوخۆی بەریتانیا لە سەردانەكەی بۆ هەولێر، سەردانی قەڵای كرد و لەوێوە لە ڤیدیۆیەكدا ئامانجی سەردانەكەی بۆ هەرێمی كوردستان و هەولێری پایتەخت ئاشكرا كرد.
ئیڤێت کوپەر، وەزیری ناوخۆی بەریتانیا لە ڤیدیۆیەكی تایبەتدا، كە كونسوڵگەری بەریتانیا لە هەولێر ئەمشەو بڵاویان كردەوە، لەسەر قەڵای هەولێر قسەی كردووە و دەڵێت، “من لە قەڵام، لە شاری هەولێری هەرێمی كوردستان، شوێنێكی ناوازەیە و دەوڵەمەندە بە مێژوویەكی دێرین”.
هەروەها دەڵێت، چاوی بە بەرپرسانی هەرێمی كوردستان كەوتووە و لە بارەی ئاڵنگارییە هاوبەشەكان لە چوارچێوەی ئاسایشدا گفتوگۆیان كردووە.
هەروەها باسی ئەوە دەكات، هاوبەشی ئەوان لەگەڵ كوردستان بۆ چەندین ساڵ پێش ئێستا دەگەڕێتەوە.
وەزیری ناوخۆی بەریتانیا ئەمڕۆ سەردانی عێراق و هەرێمی كوردستانی كرد و لەگەڵ بەرپرسانی هەردوولا كۆبوونەوەی كرد.
