هێنده‌ى نه‌ماوه‌ عەلوە هاوچەرخەکەی ئاکرێ ته‌واو بكرێت

فه‌رهاد حه‌سه‌ن

كاره‌كانى دروستكردنى عه‌لوه‌ى هاوچه‌رخى ئاكرێ به‌ره‌و ته‌واوبوون ده‌چێت، كه‌ له‌ 22 یه‌كه‌ى بازرگانى پێكهاتووه‌ و به‌ دووه‌م گه‌وره‌ترین سەنتەری بازرگانی و عەلوە لەسەر ئاستی عێراق داده‌ندرێت.

پڕۆژه‌كه‌ له‌ 11.6.2024 به‌ردى بناغه‌ى داندراوه‌ و له‌لایه‌ن كه‌رتى تایبه‌ته‌وه‌ له‌ رێگه‌ى وه‌به‌رهێنانه‌وه‌ به‌ بڕى 22 ملیۆن دۆلار جێبه‌جێ ده‌كرێت و ده‌كه‌وێته‌ سه‌ر شەقامی گشتی، نزیک بازگەی ئاکرێ ـ گردەسین.

ئه‌ندازیار زه‌ینه‌ب كه‌ریم، كه‌ نوێنه‌رایه‌تیی ده‌سته‌ى وه‌برهێنان له‌ قه‌زاى ئاكرێ ده‌كات، به‌ 964ـى راگه‌یاند، ده‌بوایه‌ پڕۆژه‌كه‌ زووتر ته‌واوبكرایا به‌ڵام به‌هۆى دروستكردنى هه‌ندێك شه‌قامى لاوه‌كى ناو و ده‌ره‌وه‌ى پڕۆژه‌كه‌، دروستكردنه‌كه‌ى دواكه‌وت و ئێستاش له‌ ته‌واوبووندایه‌.

وتیشی “ئه‌م پڕۆژه‌یه‌ به‌ دووەم گەورەترین سەنتەری بازرگانی و عەلوە لەسەر ئاستی عێراق داده‌ندرێت، جگه‌ له‌ كۆگاكردنى به‌رهه‌مه‌ وشكه‌كانى وه‌ك گه‌نم و جۆ، لە هه‌مان كاتدا ده‌بێته‌ سه‌رچاوه‌یه‌كی سه‌ره‌كى بۆ سه‌وزه‌ و میوه‌ و به‌رهه‌مه‌ كشتوكاڵییه‌كان به‌ گشتى”.

به‌پێی ئه‌و نه‌خشه‌یه‌ى كه‌ بۆ پڕۆژكه‌ بڵاوكراوه‌ته‌وه‌، عه‌لوه‌كه‌ له‌ 22 یه‌كه‌ى بازرگانى پێكهاتووه‌ و لەسەر رووبەرى 98 دۆنم زەوی دروست دەکرێت و به‌شه‌كانى پێكدێت له‌ دوکان، کۆگا، عەللاف، ساردکەرەوەی ئاسایی، ساردکەرەوەی بەفرگر، هۆڵى پێشانگا و چەندین خزمەتگوزاری دیكه‌ى وه‌ك گۆرەپان و نەمامگە و مارکێت و رێستورانت.

به‌ گوێره‌ى شوێنى دروستكردنى پڕژه‌كه‌، دووریی نێوان پرۆژەکە بۆ سەنتەری شاری هەولێر، دهۆک و سۆران تەنیا یەک کاتژمێرە و بۆ شاری موسڵیش تەنیا 40 خولەکە.