دوو پارچە تەقەمەنی لە ناو باخی هاوڵاتیەک دۆزرانەوە

توانا نەقی

لە ناو باخی هاوڵاتیەک لە ناوچەی مانگێشکی دهۆک لەلایەن تیمەکانی بەڕێوەبەرایەتی کاروباری مینەوە دوو پارچە تەقەمەنی دۆزرانەوە و هەڵگیرانەوە.

ئەمڕۆ چوارشەممە، دەزگای گشتی کاروباری مین بڵاویکردەوە، دوای ئەوەی ئاگادار کراونەتەوە لەو حاڵەتە تیمەکانیان کەوتوونەتە پشکنین و گەڕان بە ئامانجی دڵنیابوون و سەلامەتی خەڵکی ناوچەکە لە هەر مەترسیەک.

رێگر بێسفکی، بەڕێوەبەری راگەیاندن و پەیوەندیەکانی کاروباری مین و تەقەمەنی دهۆک بە 964ـی وت، ئەو هاوڵاتییە باخەکەی پاککردووەتەوە و ئەو تەقەمەنیانەی بینیوە دەست بەجێ تیمەکانی ئەوانی ئاگادار کردووەتەوە و رۆشتوونەتە شوێنەکە.

وتیشی، تەقەمەنیەکان پێکهاتوون لە گوللە هاوەنێکی 82 ملیم و مینێکی ڤاڵمار کە لەناو قوتودا شاردرابوونەوە و مێژووەیەکەی زۆر کۆن بووە.

ئاماژەی بەوەشکرد، مینەکانیان هەڵگرتووەتەوە و لە کاتێکی دیکەدا لە ناوی دەبەن و بە وردی ئەو ناوچەیەش گەڕاون بۆ پارچەی دیکەی تەقەمەنی.