بۆری گواستنەوەی ئاوی خواردنەوەی دوكان – سلێمانی شكا

+964

ئەحمەد محەمەد – سلێمانی

دوای نیوەڕۆی ئەمڕۆ چوارشەممە، بۆڕی گواستنەوەی ئاوی خواردنەوەی دوكان بۆ سلێمانی لە نزیك گوندی حاجیتان شكاوە و بەڕێوەبەری ئاوی سلێمانییش دەڵێت، “تیمەكانمان ناردووەتە شوێنەكە و جارێ نازانین قەبارەی شكاوییەكە چەندە”.

بەختیار تاهیر، بەڕێوەبەری ئاوی سلێمانی بە 964ی وت، نزیكەی كاتژمێرێك زیاترە، ئاگادار كراینەوە كە بۆڕی گواستنەوەی ئاوی دوكان بۆ سلێمانی لەنزیك گوندی حاجیتان شكاوە و تیمەكانیان گەیشتوونەتە شوێنەكە بۆ چاككردنەوەی، ئێستاش سەرقاڵی هەڵكەندنەوەی شوێنی شكاویەكەن و كاتەكەی دیارنییە كەی چاكدەكرێتەوە .

وتیشی، ئەو بۆڕییەی شكاوە هێڵی یەكی گواستنەوەی ئاوە بۆ سلێمانی و ئاوی خواردنەوەی بەشێك لە گەڕەكەكانی سلێمانی دابین دەكات.

ئاماژەی بەوەش دا، ئێستا لە دوكانەوە ئاوی بۆرییەكەمان گرتووەتەوە، تا هەڵنەدرێتەوە نازانین قەبارەی شكاوییەكە چەندە و تا ئەوكاتەش نازانین كاریگەری دەبێت لەسەر دابەشكردنی ئاو لە بەشێك لە گەڕەكەكانی سلێمانی یان نا.

بۆڕی گواستنەوەی ئاوی دوكان بۆ سلێمانی لە دوو هێڵ پێكهاتووە، هێڵی یەك لە ساڵی 1983 و هێڵی دوو لە ساڵی 2007 وە ئاو بۆ سلێمانی و دەوروبەری دەگوازنەوە.

پێداچوونەوە: ئەرسەلان عەبدوڵا

ئاوی سلێمانی ئاگری گرتووە