تەرمی ئەو کچەی لە زێی بچووکدا خنکا دۆزرایەوە

شۆڕش قادری

دوای زیاتر لە 20 کاتژمێر بەسەر خنکانی کچێکی تەمەن 16 ساڵ لە قەزای تەقتەق، كەمێك پێش ئێستا تەرمەکەی دۆزرایەوە.

کاتژمێر 1:00ـی دوای نیوەڕۆی دوێنێ سێشەممە 12.11.2024 کچێکی تەمەن 16 ساڵ بەناوی (ل، س، ع) لە قەزای تەقتەق کەوتە ناو ئاوی زێی بچووک و خنکا.

گۆران ئەحمەد سماقە بەڕێوەبەری بەرگریی شارستانیی کۆیە بە 964ـی وت، “دوای گەڕانی تیمەکانی غەواس و بەرگری شارستانی کۆیە و خەڵکی ناوچەکە، کەمێک پێش ئێستا تەرمەکەی لەلایەن چەند هاوڵاتییەکەوە دۆزراوەتەوە”.

ئاماژەی بەوەشکرد، داوای هاوکارییان لە هیچ لایەنێک نەکرد و تەنیا خەڵکی ناوچەکە لەگەڵ تیمەکانی بەرگریی شارستانیی کۆیە دەگەڕان.

زێی بچووک کە بە قەزای تەقتەق دا تێدەپەڕێت، چەندین ماڵ لەسەر زێیەکە خانوویان دروستكردووه‌، بەشێک لەو خانووانە هیچ بەربەستێک و پەرژینێکیان نییە بۆ ئەوەی تووشی ئەو جۆرە رووداوانە نەبن.

تا ئێستا هۆکار و چۆنیەتی خنکانی ئەو کچە بەوردی نەزانراوە، بەڵام بە قسەی بەڕێوەبەری بەرگری شارستانی کۆیە، ماڵی كچه‌كه‌ لەسەر زێی بچووكە و وادیارە خەریکی بەخێوکردنی پەلەوەر بووە و لە کاتی کارکردن، ئەو رووداوە روویداوە.