زاخۆ یاریی لووتكەی خولی ئەستێرەكانی عێراقی لە هەولێر بردەوە

ئەرسەلان عەبدوڵا

لە یاریی لووتكەی گەڕی حەوتەمی خولی ئەستێرەكانی عێراق، یانەی زاخۆ لە یاریگەی خۆیدا بە ئەنجامی 3-1 گۆڵ لە یانەی هەولێری بردەوە.

یارییەكە ئەم ئێوارەیە لە یاریگەی زاخۆ كرا و تێیدا گۆڵەكانی یانەی زاخۆ ناسڕ ئەحمەد 2 گۆڵ و ئەمجەد عەتوان لە خولەكەكانی 26 و 43 و 90+5 تۆماریان كرد، تاكە گۆڵی هەولێر هێلیۆ مۆنتێرۆ لە خولەكی 89 تۆماری كرد.

یانەی هەولێر لە یارییەكەدا لە گێمی یەكەم بە ئاستێكی باش دەرنەكەوت و بە دوو گۆڵی ناسڕ ئەحمەدی یەمەنی كەوتەدواوە.

لە بەرامبەردا زاخۆ توانی ئاستێكی باش پێشكەش بكات و سوود لە یاریگە و لەو جەماوەرە زۆرەشی وەربگرێت، كە بە یاریگەیان پڕ كردبوو.

هەولێر بەهۆی یاریی نەكردنی شێركۆ كەریم و ئوسامە رەشید و هەروەها ئیڤان خالید، لاوازی پێوەدیاربوو، ئەمە جگە لەوەی تێبینیی دەكرا هێڵی بەرگریی تیپەكە وەك پێویست نەیانتوانی پارێزگاری لە گۆڵی تیپەكەیان بكەن.

بەم بردنەوەیە یانەی زاخۆ بووە 12 خاڵ و لە پلەی حەوتەمی ریزبەندییە، یانەی هەولێریش ئێستا لە پلەی نۆیەمە و 11 خاڵی هەیە.