لەگەڵ بەڕێوەچوونی هەڵبژاردنی ئەمریكا نرخی نەوتیش دابەزی

ئەرسەلان عەبدوڵا

ئەمڕۆ لە كاتێكدا هەڵبژاردنی گشتیی سەرۆكایەتی ئەمریكا بەڕێوەدەچێت، نرخی نەوتیش لە بازاڕەكانی جیهان دابەزی و جیهان و بۆڕسەش چاوەڕێی ئەنجامەكان دەكەن.

ئەمڕۆ سێشەممە 5.11.2024 نرخی یەك بەرمیل نەوتی برێنت بە 74.93 دۆلار مامەڵەی پێوەكرا و بەراورد بە دوێنێ نزیكەی 15 سەنت دابەزیوە.

هەروەها نرخی یەك بەرمیل نەوتی سووكی تێكساس بە 71.33 دۆلار مامەڵەی پێوەكرا و ئەویش نزیكەی 15 سەنت دابەزی.

بەڕێوەچوونی هەڵبژاردنی سەرۆكایەتیی ئەمریكا كاریگەریی لەسەر جوڵەی بازاڕی وزە و جۆرێك لە چاوەڕوانی لە ئەنجامەكانی هەڵبژاردن هەیە، ئەمە جگە لەوەی رەوشی ناسەقامگیری ناوچەی رۆژهەڵاتی ناوەڕاستیش بەشێكە لە كاریگەرییەكانی سەر بازاڕی وزە.