سەرۆک کۆمارە کوردەکە: چاوەڕێی پەڕلەمانێکی بەهێزم

ئەحمەد مستەفا

سەرۆک کۆمارە کوردەکە لە بەغدا دەنگی دا و وتی، ئەم هەڵبژاردنەی پەرلەمانی هەرێمی کوردستان زۆر گرنگە، هیوادارم پەرلەمان ئەمجارە پەرلەمانێکی بەهێز و چالاک بێت.

ئەو ئاماژەی بەوەشکرد، تا ئێستا پرۆسەکە زۆر بە باشی بەڕێوەدەچێت و داواکارم لە تەواوی هاوڵاتیان بەشداریی دەنگدان بکەن.

لەتیف رەشید سەرۆک کۆماری عێراق لە بنکەی تایبەتی دەنگدان لە هۆتێل رەشیدی شاری بەغدا دەنگیدا، کە بنکەیەکە بۆ دەنگدەرانی گشتی کراوەتەوە و دوای قسەی بۆ رۆژنامەنووسان کرد.

وتی، ئەمڕۆ هەڵبژاردن لە هەرێمی کوردستان بەڕێوەدەچێت و پیرۆزبایی لە تەواویی هاوڵاتیانی هەرێم دەکەم، پیرۆزبایی لە لایەنە براوەکان دەکەم هیوام وایە بتوانن لە ئاست خزمەتکردنی هاوڵاتیاندابن.

باسی لەوەش کرد، تا ئێستاش پرۆسەکە زۆر بە باشی بەڕێوەدەچێت و داواکارم لە تەواوی هاوڵاتیان بەشداری دەنگدان بکەن.

لەبارەی پەڕلەمانی نوێ، لەتیف رەشید وتی، ئەم هەڵبژاردنە زۆر گرنگە و هیوادارم پەرلەمانی ئەمجارە پەرلەمانێکی بەهێز و چالاک بێت و هیوام وایە هەرزوو پەرلەمان دەستبەکاربێت و حکومەتێکی چالاک و خزمەتگوزار هەڵبژێرین.