بەریتانیا لە مەشقپێكردنی هێزەكانی پێشمەرگە بەردەوام دەبێت

964+

ئەرسەلان عەبدوڵا

لە كۆبوونەوەیەكی سەرۆکی ئەرکانی وەزارەتی پێشمەرگە و راوێژکارێكی سەربازی کونسوڵخانەی بەریتانیا لە هەولێر، دووپاتی بەردەوامیی پرۆسەی مەشقپێدانی هێزەكانی پێشمەرگە لە لایەن راوێژكارانی بەریتانی كرایەوە.

وەزارەتی پێشمەرگەی كوردستان راگەیاندراوێكی بڵاوكردەوە و ئاماژەی بەوەدا، فەریق روکن عیسا عوزێر سەرۆکی ئەرکانی وەزارەتی پێشمەرگە، لەگەڵ کۆڵۆنێڵ جون فۆستر، راوێژکاری سەربازی لە کونسوڵخانەی بەریتانیا لە هەولێر و تیمێکی یاوەری  كۆبوونەوە.

كۆبوونەوەكە دووشەممە 7.10.2024 ئەنجامدراوە و باس لە برەودانی زیاتر بە هەماهەنگی لە نێوان هێزی پێشمەرگە و وڵاتانی هاوپەیمانی نێوودەوڵەتی لە ناویاندا بەریتانیا کراوەتەوە.

هەروەها وەك باس كراوە، “پرسی مەشق و راهێنانەکان و پڕۆسەی ریفۆرم و کردنەوەی خولە جیاوازەکان بە مەبەستی رێکخستنەوەی زیاتری هێزەکان و بە پرۆفیشناڵکردنی هێزی پێشمەرگە خراونەتە بەرباس”.

بە پێی راگەیاندراوەكە، هەردوولا کۆکبوون لەسەر هەماهەنگی و گرنگیدانی زیاتر بە پەیوەندییەکانی نێوانیان و شاندی سەربازیی بەریتانیا دووپاتیانکردەوە، کە “بەردەوام دەبن لە هەماهەنگیکردن بۆ کردنەوەی خول و پێدانی راوێژ بە هێزی پێشمەرگەی کوردستان، وەک نیشاندانی پەیامی دۆستانەی حکومەتی بەریتانیا بۆ وەزارەتی پێشمەرگە و حکومەتی هەرێمی کوردستان”.

"با پێشمەرگە سەنگەرەكانی توندوتۆڵتر بكات"