بەنزینخانەیەک
وتەبێژی كۆمەڵەی بەنزیخانەكانی هەولێر:
چاوەڕێ دەكرێت لەم رۆژانە نرخی بەنزین هەرزان دەبێتەوە
964+
ئەرسەلان عەبدوڵا
جەنگی مەجید وتەبێژی كۆمەڵەی بەنزیخانەكانی هەولێر ئەمڕۆ شەممە 14.9.2024 رایگەیاند، بازگەكان بە رووی هاتنی بەنزین بۆ هەولێر كراوەتەوە و لەم رۆژانە نرخی بەنزین هەرزان دەبێتەوە.
چەند رۆژێكە نرخی بەنزین لە هەولێر گران بووە و نرخی یەك لیتر بەنزینی نۆرمال 925 تا 950 دینارە، لە كاتێكدا هەفتەی پێشوو بەنزین بە 820 دینار بوو بۆ هەر لیترێك.
سەبارەت بە گرانبوونی بەنزین، بە تایبەتی جۆری نۆرماڵ، خاوەنی یەكێك لە بەنزینخانەكانی هەولێر، كە نەیویست ناوی ئاشكرا بكرێت، بە 964ی وت، ئەو دوو كۆمپانیا گەورەیەی هەولێر، كە بەنزین و بەرهەمەكانی نەوت بەرهەم دەهێنن، بەنزین دەنێرنە ناوچەكانی دیكەی عێراق و هەروەها وڵاتانی دەرەوە، بۆیە بەنزینەكە كەم بووەتەوە و بەشی بازاڕی هەولێر ناكات.
ئەو خاوەن بەنزینخانەیە وتیشی، بەو بەشە بەنزینەی دەدرێتە هەندێك لە بەنزیخانەكانی هەولێر و بە نرخی 750 دینار بۆ هەر لیترێك دەفرۆشرێت، تا نیوەڕۆ بەردەست دەبێت و دواتر نامێنێت و كەمە.
سەبارەت بە هەوڵی هەرزانبوونەوەی نرخی بەنزین، جەنگی مەجید وتەبێژی كۆمەڵەی بەنزیخانەكانی هەولێر ئاماژەی بەوەدا، ئێستا بازگەكان كراوەن و رێگە بە هاتنی بەنزین بۆ هەولێر دەدرێت، بۆیە چاوەڕێ دەكەین لە چەند رۆژی داهاتوو، بە تایبەتی تا دوای 20ی مانگ بەنزین هەرزان ببێتەوە.
وتیشی، رێگە لە بەردەم بازرگانان كراوەیە بۆ هێنانی بەنزینی بازرگانی لە دەرەوە، پێشتر بازگەكان رێگەیان نەدەدا داخڵی هەولێر بێت، بەڵام ئێستا بازگەكان كراوەن.
