دەروازەى زانکۆى سلێمانى
بڕیاردرا
28ـى ئەم مانگە ساڵى نوێى خوێندن لە زانکۆى سلیمانى دەستپێدەکات
964+
وریا فەتاح
زانکۆی سلێمانی وادەی دەستپێکردنی ساڵی نوێی خوێندنی دیاریکرد و رۆژى 28ـى ئەم مانگە، دەستپێدەکات.
سەرۆکایەتى زانکۆى سلێمانى بڵاوى کردەوە، ئەنجومەنی زانکۆی سلێمانی لە کۆبوونەوەی ئاسایی خۆی لە رۆژی چوارشەممە بڕیاریدا کە رۆژی 28.9.2024، دەستپێکی ساڵی نوێی خوێندنی 2024- 2025 بێت.
زانکۆى سلێمانى، تەواکردنى سەرجەم پێداویستییەکانى بەشە ناوخۆییەکان و رێکارە دارایى و کارگێڕییەکانى گرێبەستى پاککردنەوەى بەشە ناوخۆییەکانى کردووە بە مەرجى دەستپێکردنەوەى دەوام.
زانکۆى سلێمانى لە ساڵی 1968 دامەزراوە، یەکێکە لە گەورەترین و بەناوبانگترین زانکۆکان لە هەرێمی کوردستانی عێراقدا.
لە ساڵی 1981 دا، رژێمی بەعس زانکۆى سلێمانیى بە زەبری هێز بۆ هەولێر گواستەوە و ناوەکەی بۆ “زانکۆی سەلاحەدین” گۆڕی.
لە ساڵی 1992 دا، زانکۆی سلێمانی بۆ جارى دووەم لەلایەن رۆشنبیران و ئەکادیمیانى کوردەوە دامەزرێنرایەوە.
زاکۆى سلێمانى لەڕووی ئەکادمییەوە هەردوو پرۆگرامی بەکالۆریۆس و خوێندنى باڵا پێشکەشدەکات و بڕوانامەی بەکالۆریۆس، بڕوانامەی دیبلۆمی باڵا، ماستەر و بڕوانامەی دکتۆرا دەبەخشێت.
زانکۆی سلێمانی چەندین گۆڤاری ئەکادیمی بڵاودەکاتەوە.
زانکۆى سلیمانى لە پێنج کەمپ پێکهاتووە:
کەمپی کۆن: دەکەوێتە ناوەندی شارەوە
کەمپی نوێ: دەکەوێتە سەر رێگەی سەرەکیی سلێمانی – کەرکووک
کەمپی سەیدسادق: لە شارۆچکەی سەیدسادقە
کەمپی چوارتا: لە قەزای چوارتایە
کەمپی بەکرەجۆ : دەکەوێتە گەڕەکی بەکرەجۆوە
زانکۆى سلیمانى ئەم سەنتەرانە لەخۆدەگرێت:
سەنتەرى زمان و کەلتوور
سەنتەری یەکسانیی جێندەر
سەنتەری کوردۆلۆژی
سەنتەری کوردستان بۆ دۆکیۆمێنت و لێکۆڵینەوەی ئەکادیمی
سەنتەری ڕاهێنانی پێداگۆجی و گەشەپێدانی ئەکادیمی
سەنتەری سیسکۆ
