خاوەن پێداویستییە تایبەتەکانى پێنجوێن بچن بایۆمەتری بکەن

964+

ئەحمەد مستەفا

سەنتەری پاراستنی منداڵان لە پێنجوێن، ماوەی 10 رۆژی دیاری کرد بۆ ئەو خاوەن پێداویستی تایبەتانەی کۆدی بایۆمەترییان نییە، دەتوانن سەردانیان بکەن و بایۆمەتریان بۆ دەکەن.

بەڕێوەبەرایەتییەکانی چاودێری کۆمەڵایەتی، بۆ رێکخستنەوەی رێکاری دابەشکردنی موچە داوای کۆدی بایۆمەتری، کارتی نیشتمانی، کارتی زانیاری و پێناسی کەمئەندامی لە سەرجەم کەمئەندام و خاوەن پێداویستی تایبەتەکان کردووە.

لە ئاگاداریى نامەیەکدا، کە وێنەیەکی بۆ 964 نێردراوە، سەنتەری پاراستنی منداڵان لە قەزای پێنجوێن کە دەکەوێتە گەڕەکی ناوشاخانی قەزاکە، ئاماژەی بەوەکردووە، “ئاگاداری سوودمەندانی، خاوەن پێداویستی تایبەت و کەمئەندام دەکەین لە ماوەی 10 رۆژدا سەردانی بنکەی چاودێری کۆمەڵایەتی پێنجوێن بکەن بەمەبەستی دروستکردنی کۆدی بایۆمەتری بۆیان”.

وەک تێبینییەکان بۆیان ئەوەی خستووەتەڕو، “پێویستە سوودمەند خۆی ئامادە بێت و پێناس یان کارتی نیشتیمانی و کارتی زانیاری و پێناسی کەمئەندامیان پێبێت و  لە 1.9.2024 پڕۆسەکە دەستی پێ کردووە و 10.9.2024 بەردەوام دەبێت”.

پێشتر، بەڕێوەبەرایەتی تۆڕی پاراستنی کۆمەڵایەتی گشتی سلێمانی رایگەیاندبوو، هەموو ئەو هاوڵاتییە خاوەن پێداویستیە تایبەتانەی کە هاوکاری کەمئەندامی وەردەگرن سەردان بکەن و کۆدی بایۆمەتری لەگەڵ خۆیان بهێنن و ئەوانەی کۆدی بایۆمەتریان نیە کارتی نیشتیمانی و ناسنامەی کەمئەندامی بهێنن بەمەبەستی دروستکردنی کۆدی بایۆمەتری، هەر هاوڵاتیەکی خاوەن پێداویستی تایبەت سەردان نەکات هاوکاریەکەی رادەگیرێت.

بڕۆن بایۆمەتری بکەن دەنا موچەکانتان دەبڕدرێت

کەمئەندامە بێ کۆدەکانی شارەزوور بچن بایۆمەتری بکەن