دوو کچەکە لەگەڵ سەرپەرشتیاری ئیدارەی سۆران لە کاتی دانانی بەردی بناغەی پڕۆژەکە وێنە: ئیدارەی سۆران
لە سۆران
لەسەر داوای دوو منداڵ گەڕەکێک قیرتاو دەکرێت
+964
ژێوار خدر
ماوەیەک لەمەو پێش و لە کاتی بارانباریندا سەرپەرشتیاری ئیدارەی سۆران، سەردانی گەڕەکی وەستا رەجەبی کردووە لە قەزای سۆران، دوو کچی بچووک بەناوەکانی هێڵین و هاڤین، داوایان لێ کردووە گەڕەکەکەیان بۆ قیرتاو بکەن.
ئەمڕۆ سەرپەرشتییاری ئیدارەی سۆران لەگەڵ دوو کچەکە بەردی بناغەی قۆناغی دووەمی قیرتاوکردن و تۆڕی ئاوی گەڕەکەکەیان دانا.
ئەمڕۆ یەکشەممە، ئیدارەی سەربەخۆی سۆران ئەم پۆستەیان لە فەیسبوکەکەی خۆیان کردووە و دەڵێن لەسەر داوای دوو منداڵی کچ و بە ئامادەبوونی ئەوان بەردی بناغەی پڕۆژەکە داندراوە.
هەر بەپێی پۆستەکە، پڕۆژەکە پێکهاتووە لە قیرتاوکردن و دانانی تۆڕی ئاوی گەڕەکەکە و بە بڕی یەک ملیار و 738 ملیۆن و 650 هەزار دینار لەسەر بودجەی ئیدارەی سەربەخۆی سۆران جێبەجێ دەکرێت.
پێشتر گەڕەکی وەستا رەجەب، یەکێک بووە لەو گەرەکانەی کێشەی کەمیی ئاویان هەبووە و ئێستا لەگەڵ جێبەجێکردنی ئەو پڕۆژەیە کێشەکەیان چارەسەر دەبێت.
