تونێلى دەربەندیخان کرایەوە

وریا فەتاح

دواى نزیکەى 10 کاتژمێر لە داخرانى بەهۆى رووداوەکەى نیوەشەوى رابردووى ناو تونێلەکە، کەمێک پێش ئێستا تونێلەکە بەڕووى شۆفێراندا کرایەوە.

رووداوەکە کاتژمێر 1:30 خولەکى بەیانى ئەمڕۆ، بارهەڵگرێکی گواستنەوەی سووتەمەنی لەناو تونێڵی دەربەندیخان وەردەگەڕێت و دەکەوێت بەسەر ئۆتۆمبێلێکی تایبەتدا کە پێنج سەرنشینی تێدا بووە و دوانیان لە شوێنى رووداوەکە گیانیان لەدەست داوە و سێ لە بریندارەکانیش رەوانەى نەخۆشخانەکانى سلێمانى کراون.

جاسم عەلیخان، بەڕێوەبەرى هاتووچۆى دەربەندیخان بە 964ـى وت،”کەمێک پێش ئێستا، دواى دەرهێنانى ئۆتۆمبێلەکان و پاککردنەوەى ناوەوەى تونێلەکە، تونێل بەڕووى هاتوچۆى شۆفێراندا کرایەوە”.

وەک باسى دەکات، زیاتر لە نۆ کاتژمێر تونێلەکە بەڕووى هاتوچۆى ئۆتۆمبێلەکاندا داخرابوو، چونکە بارهەڵگرەکە رێژەیەکى زۆر سوتەمەنى هەڵگرتبوو و بەتاڵکرا.