شۆفێرەکە گیانی سپارد
مینی پاسێك لە رێگای خەلەكان وەرگەڕا و 11 كەس بریندارن
964+
رێژوان مامەقادر – سلێمانی
لە وەرگەڕانی مینی پاسێكی گواستنەوەی هاوڵاتیان لە نێوان سلێمانی و هەولێر، 11 كەس برینداربوون و یەكێك لەوان شۆفێرەكەیە و دواتر گیانی لە دەست دا.
پاسەكە لە نێوان هەردوو گوندی بادەوان و بێستانە لە سنووری ناحیەی خەلەكان وەرگەڕا و 14 سەرنشینی هەڵگرتبوو، ئێستاش برینی 2-3 كەسیان سەختە.
نوێكرایەوە 12:53
مەڵبەند حەمەد بەڕێوەبەری بنكەی تەندروستیی خەلەکان بە 964ی راگەیاند، شوفێری پاسەكە گیانی لە دەست داوە، 10 كەسی دیكە بریندارن و خەریكە بە ئەمبۆلانس دەگوازرێنەوە بۆ نەخۆشخانە.
وتیشی، پاسەكە 14 كەسی تێدابووە و هەموویان كوردن و یەك كەسیان هاوڵاتییەكی عەرەبە، پاسەكە لە سلێمانییەوە بەرەو هەولێر رۆیشتووە.
مەڵبەند حەمەد ئەوەشی وت، برینی 2-3 كەس لە بریندارەكان سەختە.
نوێكرایەوە 12:46
رێپێدراوێكی پۆلیس لە بنكەی پۆلیسی هاتوچۆی خەلەكان بە 964ی وت، یەكێك لە بریندارەکان گیانی لە دەست دا.
وتیشی، پاسەكە لە سلێمانییەوە بەرەو هەولێر رۆیشتووە و لە نزیك گوندی بادەوان تووشی رووداوەكە بووە.
964 هێشتا هەوڵی زانیاریی زیاتر و پشتڕاستکراوە لە بارەی رووداوەکە دەدات.
نوێكرایەوە كاتژمێر 12:40
سامان نادر، بەڕێوەبەری فریاکەوتنی خێرای سلێمانی بە 964ی راگەیاند، تیمەکانی فریاگوزاری سلێمانی، حاجیتان، پیرەمەگروون بەرەو شوێنی رووداوەکە دەڕۆن بۆ بەهاناوەچوونیان.
وتیشی، “کەمێکی دیکە دەگەینە لای رووداوەکە و زانیاری و وردەکارییەکەی دەزانین و تەواوی بریندارەکانیش دەگوازینەوە شاری سلێمانی”.
هەواڵی سەرەتا
لە سنووری ناحیەی خەلەکان لە پارێزگای سلێمانی مینی پاسێک وەرگەڕا و 11 کەس بریندارن، راگەیاندنی هاتوچۆی سلێمانی هەواڵەكەی بڵاوكردووەتەوە.
بە پێی ئەو زانیارییانەی دەستکەوتووە، مینی پاسەكە لە هێڵێكی نێوان هەولێر و سلێمانی كاردەكات.
پێداچوونەوە: ئەرسەلان عەبدوڵا
