دیمەنی کارکردن لە دووسایدی گەزنە. فۆتۆ: وەزارەتی شارەوانی
كەی تەواو دەبێت؟
سەرۆكی شارەوانیی هەولێر وادەی تەواوبوونی رێگەی دووسایدی گەزنە دەخاتەڕوو
+964
ئەرسەلان عەبدوڵا
سەرۆكی شارەوانی هەولێر ئاشكرای كرد، بە پێی چاوەڕوانییەكانی ئەوان، لە كەمتر لە سێ مانگدا رێگەی دووسایدی گەزنە تەواو دەبێت، كە هەردوو شەقامی 120 مەتری و 150 مەتری، هەروەها رێگەی شاری هەولێر بە شاری دهۆك بەیەكەوە دەبەستێتەوە.
كارزان عەبدولهادی، سەرۆكی شارەوانیی هەولێر ئەمڕۆ یەكشەممە 28.7.2024 بە 964ی وت، بەپێی خەمڵاندن و شێوازی كاركردنەكە، كەمتر لە سێ مانگی دیكە كارەكانی رێگەكە تەواو دەبێت.
سەرۆكی شارەوانیی هەولێر ئەمڕۆ یاوەریی وەزیری شارەوانی و گەشتوگوزاری كردووە بۆ سەردانی كارەكانی دووسایدكردنی رێگەكە.
بیرتان نەچێ.. هەوڵبدەن رێتان نەکەوێتە گەزنە
رێگەكە درێژییه‌كه‌ی زیاتر له سێ كیلۆمه‌تر ده‌بێت و لەلایەن كۆمپانیاكانی كەرتی تایبەتەوە جێبەجێ دەكرێ، سەرۆكی شارەوانییش وتی، هەوڵ دەدرێت كارەكان زوو تەواو بكرێت، چونكە رێگەكە گرنگە.
لەوەتەی 13ی ئەم مانگەوە رێگەی “هەولێر – گەزنە” داخراوە، لە بەرانبەردا شۆفێران دەتوانن رێگەی هەولێر-بەحركە بۆ گەیشتن بە شەقامی 150 مەتری و 120 مەتریی هەولێر بەكاربهێنن.
پێشتر وەزیری شارەوانی لە لێدوانێكدا لە 27ی تشرینی دووەمی 2022 رایگەیاندبوو، بە تەواوبوونی ئەو سێ كیلۆمەترەی شەقامەكە، تەواوی رێگەی 120مەتری تا دهۆك و زاخۆ بە دووساید دەبێت و قەرەباڵغی لەسەر ئەو شەقامە نامێنێت.
