زوومی 30Xی کامێرای گالاکسی S23 Ultra نایابە
+964
بڵند عوسمان – هەولێر
دوای بڵاوبوونەوەی چەند وێنەیەکی دزپێکراوی گالاکسییە نوێکە، وێنەکان پێمان دەڵێن زوومی 30Xـیەکەی نایابترە لەوەی پێش خۆی.
وابڕیارە لە یەکی شوباتی ئەمساڵ کۆمپانیای سامسۆنگ باشترین و ئاست بەرزترین بەرهەمی خۆی نمایش بکات، کە ئەویش زنجیرەی گالاکسی S23ـە بەتایبەتیش لەناو زنجیرەکەدا گالاکسی S23 Ultraـیە.
گالاکسی S23 Ultra لەپاڵ هەبوونی تایبەتمەندییە ئاست بەرزەکانی خێرایی و شاشە، خاوەنی کامێرایێکی زۆر تایبەتە، بەو پێیەی کامێرای سەرەکی 200 مێگاپێکسڵە و توانی هێنانە پێشەوەی 100 جاری هەیە.
بەر لە بڵاوبوونەوە و ناساندنی مۆبایلەکە چەند وێنەیەک دزەیان پێکراوە کە تایبەتمەندی هێنانەپێشی تێدا بەکارهاتووە، وێنەکەش 30 هێندە هێنراوەتە پێش، لەگەڵ ئەمەشدا وێنەکە لە رووی کوالێتییەوە زۆر باش و شیاوە.
مۆبایلی زنجیرەی S لەلایەن کۆمپانیای سامسۆنگی کۆری بەرهەمدەهێدنرێت، کە یەکەم نەوەی لە ساڵی 2009 دروستکرد و سەرکەوتنێکی گەورەی تۆمار کرد.