ئاکرێ نوسینگەی پاسپۆرتی کردەوە و دوو بەشی دەبێت

964+

هیڤی دێوالی – دهۆک

ئەمڕۆ یەکشەممە 21.7.2024، بۆیەکەمجار بەشی نوسینگەی پاسپۆرتی ئەلیکترۆنی لە قەزای ئاکرێ کرایەوە، بەڕێوەبەری پاسپۆرتی ئاکرێش دەلێت، لە ئەمڕۆوە هاوڵاتیان دەتوانن لە ئاکرێ داوای پاسپۆرتی ئەلیکترۆنی بکەن.

بەشی نوسینگەی پاسپۆرتی ئەلیکترۆنی لە قەزای ئاکرێ لە دوو بەش پێکدێت؛ بەشی وەرگرتن و بەشی رادەستکردنی پاسپۆرت بۆ هاوڵاتیان، شوێنەکە هەر لە بەڕێوەبەرایەتی پاسپۆرتی ئاکرێیە لە شەقامی گشتی ئاکرێ و لە بەرامبەر هۆڵی کۆنفڕانسەکان.

عەقید دەریان محەمەد، بەڕێوەبەری پاسپۆرت لە قەزای ئاکرێ بە 964ـی وت، ئەمڕۆ بۆ یەکەمجار لە بەڕێوبەرایەتیەکەمان نوسینگەی پاسپۆرتی ئەلیکترۆنی کرایەوە، هاوڵاتییان دەتوانن لێرەوە دەست بە مامەڵەکانیان بکەن.

وتیشی، هاوڵاتیانی هەرسێ قەزایی “ ئاکرێ و شێخان و بەردەڕەش” ناچنە پارێزگاری دهۆک و رێگەی دوور و درێژ بۆ دەرکردنی پاسپۆرتی ئەلیکترۆنی ناگرنەبەر.

ئاماژەی بەوەشکرد، له‌ سیستمى پاسپۆرتی ئەلیکترۆنی، هاوڵاتی لە رێگای ئەپلیکەیشنەوە زانیاری پرده‌کەنه‌وه‌ و کات و رۆژی سەردانیان بۆ دیار دەکرێت بەڵام “پێویستە کارتی بانک یان ماستەر کارتیان هەبێت چونکە لە رێگای بانکه‌وه‌ ده‌بێت بڕی 92 هەزار دینار بنێرن”.

لە دیزاینی پاسپۆرتی ئەلیکترۆنیدا “سیم کارت”ێک هەیە، کە لە پەڕەی یەکەمدایە و پەڕەکەش پلاستیکییە، هەروەها پەڕەکانی دیکەشی نەخشێندراوە و چەند تایبەتمەندییەکی پێدراوە.

پێداچوونەوە: میدیا گۆران