لە پاڵاوگەیەک شەڕ روویدا
ئەم بەرەبەیانییە دوو کەس کوژران
964+
شۆڕش عەبدوڵا- هەولێر
کاتژمێر 3:00ـى بەرەبەیانى ئەمڕۆ، لە پاڵاوگەیەکى سنوورى کەورگۆسک شەڕ روویدا و دوو کەس کوژران.
بەپێى ئەو زانیاریانەى 964 دەستى کەوتووە، شەڕەکە لە پاڵاوگەیەکى ناحیەى کەورگۆسک لە سنوورى قەزاى خەبات، لە نێوان دوو لایەندا روویداوە و بەهۆیەوە دوو کەس کوژراون کە یەکێکیان کارمەندى سیکیورتییە.
سەرچاوەیەک لە پۆلیسى خەبات بە 964ـى وت، لە رووداوەکەدا دوو کەس کوژراون و دوو کەسیش بریندارن.
ئاشکراشى کرد، هەردوو کوژراوەکە دانیشتووى قەزاى خەباتن.
بە وتەى شایەدحاڵێکى رووداوەکە کە بۆ 964 قسەى کردووە، درەنگانێکى شەو لە نێوان کارمەندانى سیکیۆرتى پاڵاوگەکە و شۆفێرى بارهەڵگرەکان دەمەقاڵێ روویداوە، بەڵام دواتر کۆتایى پێهاتووە، دواتر لە بەرەبەیانیدا هاتوونەتە ناو پاڵاوگەکە و جارێکى دیکە دەمەقاڵێ روویداوەتەوە و تەقەیان لە یەکترى کردووە.
964 چەند جارێک پەیوەندى بە لایەنە ئەمنییەکانەوە کرد، بەڵام بەبیانوى لێکۆڵینەوە لە رووداوەکە ئامادە نەبوون زانیارى بدرکێنن.
پێداچوونەوە: وریا فەتاح
