یەکێک لە ژوورەکانی سەنتەری شیاندنەوە لە چاکسازی هەولێر _ وێنە: چاکسازی هەرێمی کوردستان
"مەترسییەکی گەورە هەیە"
هەولێر بوو بە خاوەن سەنتەری شیاندنەوەی ئالودەبووانی مادەی هۆشبەر
ئەحمەد مستەفا
لە هەولێریش ئیتر سەنتەری شیاندنەوەی ئالوودەبوانی ماددەی هۆشبەر هەیە، ئەو کەسانەی توشبووی یان بەکارهێنەری مادەکە بوون، هەوڵی چارەسەرکردنیان دەدرێ و دواتر دەگەڕێندرێنەوە ناو کۆمەڵگە.
ئەمڕۆ چوارشەممە 12.6.2024، بەڕێوەبەری گشتی چاكسازی كۆمەڵایەتی هەرێمی کوردستان، یەكەمین سەنتەری شیاندنەوەی ئالوودەبوانی مادەی هۆشبەری لە شاری هەولێر و لە ناو چاكسازی ژنان و منداڵان کردەوە.
ئیحسان جەبار، بەڕێوەبەری گشتی چاكسازی كۆمەڵایەتی بە 964ی وت، “ئامارەكانی بەكارهێنەرانی ماددەی هۆشبەر رۆژانە لە بەرز بوونەوەدایە و گەر لایەنەكانی پەیوەندیدار بەم بابەتە رێكاری پێویست بۆ رێگریكردن لە زیاتر بڵاوبوونەوەی نەگرنە بەر ئەوا مەترسیەكی گەورە لەداهاتوودا رووبەروومان دەبێتەوە”.
ئەوەشی وت، “لەڕێگەی كردنەوەی ئەم سەنتەرەو بەهەوڵ و ماندوبوونی ستاف و كادیرانمان دەمانەوێت خزمەتێك بە تووشبوان و بەكارهێنەرانی ئەم ماددەیە بكەین و لەڕێی شیاندنەوەیان دووبارە وەك كەسێكی ئاسایی بگەڕێنەوە ناو خانەوادەو كۆمەڵگا”.
پێشتر لە هەردوو چاكسازی گەوران و ژنان و منداڵان سلێمانی و چاكسازی گەورانی دهۆك ئەم سەنتەرە كراەوەتەوە، بەڕێوەبەری چاکسازیی کۆمەڵایەتی وتی، “ژمارەیەكی زۆر لە بەكارهێنەرانی ماددەی هۆشبەر سوودیان لە چارەسەریەكانی ئەم سەنتەرانە بینیوە و چاك بوونەتەوە”.
دیمەنی کردنەوەی سەنتەری شیاندنەوەی ئالودەبووانی مادەی هۆشبەر:
