لە ناحیەی شەمامک
زیاتر لە 80 دۆنم زەوی سووتا
964+
ئەحمەد شەمزین – هەولێر
ئێوارەی ئەمڕۆ دووشەممە، ئاگر لە دەشتی شەمامک کەوتەوە و بەشێک لە جوتیاران زیانیان پێگەیشت.
ئاگرەکە بە شێوەیەک بوو ئەگەر هاوکاری خەڵک نەبوایە بە ئەستەم کۆنتڕۆڵ دەکرا و 200 کەس و 15 تراکتۆر بەشداربوون لە کۆنتڕۆڵکردنی ئاگرەکە.
سەنگەر یوسف، دانیشتووی گوندی شێخ شێروانە و بۆ 964 وتی، دوو ئۆتۆمبێلی بەرگریی شارستانیی کۆمپانیای کار بەهانای جوتیارەكانەوە هاتن، زیاتر لە 15 تراکتۆر و خەڵکی گوندیش بە گشتی هەموو لەوێ بوون و هەوڵی کۆنتڕۆڵکردنی ئاگرەکەیان داوە.
وتیشی، زەوییە سووتاوەکە نزیکەی 80 دۆنم بووە و هی چوار جوتیار بووە.
گوندی شێخ شێروان دەکەوێتە سنووری ناحیەی شەمامك، خەڵكەكەی بە ئاژەڵداری و كشتوكاڵكردنەوە سەرقاڵن.
پێداچوونەوە: توانا نەقی
