بەشێک لە فەرمانبەرانی بەشەکە لەناو بینا نوێکەیاندا - وێنە: شارەوانیی سلێمانی
"فەرمانبەر و سەرندانیکەریان زۆرە"
بەشی زیادەڕۆیی شارەوانیی سلێمانی بوو بە خاوەن بینای خۆی
964+
پێشەوا محەمەد
بەشی زیادەڕۆیی شارەوانیی سلێمانی بوو بە خاوەنی بینای خۆی و وتەبێژەکەی دەڵێت، پێشتر شوێنەکەیان زۆر بچووک بووە و هاوڵاتیان بەردەوام گلەییان هەبووە.
بەشی زیادەڕۆیی شارەوانی بەشێکی قەرەباڵغە و جگە لەو ناوەندە سەرەکییە نزیکەی 10 لیژنەی دیکەی شارەوانییەکانی دیکەی دەوروبەری سلێمانی لەسەرە.
زەردەشت رەفیق، وتەبێژی شارەوانیی سلێمانی بە 964ـی وت، “ئەو بەشە هەم فەرمانبەرێکی زۆری هەیە هەم قەرەباڵغە و بەردەوام سەردانیکاری زۆری هەیە، بۆیە ئەو بینایەیان پێویست بوو چونکە شوێنی پێشتریان زۆر بچووک بوو”.
بیناکە کەوتووەتە گەڕەکی مەجید بەگ لە شاری سلێمانی و هاوڵاتیان دەتوانن لەمەودوا بۆ هەر کارێکی زیادەڕۆ سەردانی ئەو بینا نوێیە بکەن.
وتەبێژەکەی شارەوانیی سلێمانی وتیشی، “بیناکە موڵکی شارەوانییە و نۆژەن کراوەتەوە و دراوە بەو بەشە تا ئیشوکارەکانی هاوڵاتیانی تێدا رایی بکەن و گلەیی و ناڕەزایەتیی هاوڵاتیانیش کۆتایی بێت”.
ئاماژەی بەوەش دا، چەند بەشێکی دیکەیان هەیە بە هەمان شێوە پێویستیان بە شوێنی گەورەترە و لە ئاییندەدا هەوڵ دەدەن بینای ئەوانیش بگۆڕن.