دیمەنی بەشێکی بەنداوەکە.
قایمقام: بەبێ کەموکوڕی بەنداوەکە وەردەگرین
بەنداوی دێوانە پێش ئەوەی رادەستی حکومەت بکرێ هەڵوەشاوە
964+
ئەحمەد مستەفا
بەنداوی دێوانە، کە بەیەکێک لە بەنداوە گەورەکانی هەرێمی كوردستان دادەنرێت دادەنرێ، لە 2010 بڕیاری جێبەجێكردنی دراوە و کارکردن لە پڕۆژەكەدا پێنج جار بە هۆكاری جیاواز وەستاوە.
تائێستاش کە رادەستی حکومەت نەکراوە، تازە بە تازە، بەشێک لە کۆنکرێتی تێپەڕبوونی دەرچەی سەرڕێژەکان هەڵوەشاوە و هەندێک لە راگیرەکان بەبێ بوونی برغو جێهێڵدراون، ئەوەش بەپێی ئەو وێنانەی 964 دەستیکەوتووە و ساغی کردوونەتەوە.
بەنداوی دێوانە، دەکەوێتە باشووری قەزای دەربەندیخان و بڕیارە بۆ كاری كشتوكاڵی سوودی لێوەربگیرێت بە تایبەت لە وەرزی هاویندا، پێش ئەوەی کارەکانی تەواوبکرێ و رادەستبکرێ، بەنداوەكە لە ساڵی 2022 بەهۆی كەمی باران سەرڕێژ نەبوو، بەڵام لە 8.3.2023 سەرڕێژی كرد، و ئەمساڵیش لە وەرزی باران بارین دووبارە سەرێژی کردەوە، لە ئێستادا نزیكەی 19 ملیۆن و نیو مەتر سێجا ئاوی تێدایە.
بەنداوی دێوانە به‌ده‌ست ئاوەڕۆی دەربەندیخان گرفتاره
ئەمڕۆ شەممە 4.5.2024، سلێمان محەمەد، قایمقامی قەزای دەربەندیخان بە 964ی وت، “تائێستا ئەوان وەک لایەنی حکومەت بەنداوەکەیان رادەست نەکراوە، ئاگادارن کە هەڵوەشانەوە و کێشە لە بەنداوەکەدا هەیە، و لیژنەیان پێکهێناوە تا کەموکوڕییەکان دیاری بکرێت و چارەسەر بکرێن”.
قایمقامی دەربەندیخان رەتی کردەوە، ئەوان بەو شێوەی ئێستا بەنداوەکە وەربگرن لە کۆمپانیای جێبەجێکار و وتی، “هەتا کەموکوڕییەکان چارەسەر نەکرێن، حکومەت بەنداوەکە لە ئەستۆی خۆی ناگرێ، ئێمە نوێنەری ئەندازیاریمان هەیە و پێداچوونەوە و هەڵسەنگاندنی تەواو بۆ پڕۆژەکە دەکەین”.
بەنداوی دێوانە، 42 مەتر بەرز و 260 مەتر پانە، تێچووی دروستكردنی 24 ملیار دینار بووە و توانای گلدانەوەی 21 ملیۆن مەتر سێجا ئاوی هەیە.
سەرچاوەی ئاوی بەنداوی دێوانە ئاوی شاخەكانی قۆپی قەرەداغ و چەمی دێوانە و نیوەی شاخی بەرانانە. ئەم بەنداوە رووماڵی هەندێك لە ئاوی بانی خێڵان دەكات و دەڕژێتەوە ناو داون ستریمی بەنداوی دەربەندیخان، یان رووباری سیروان. لەوێشەوە دەڕواتەوە بۆ باوەنوور و كەلار و بەنداوی حەمرین.