فۆتۆ: social media
دزی لە 50 شوێنەواری ئاکرێ کراوە
964+
عەمار عەزیز – دهۆک
بەهۆی نەبوونی پاسەوانەوە 50 شوێنەواری مێژوویی ئاکرێ دەستکاریکراون و پارچەیان لێدزراوە. بەڕێوەبەرایەتی شوێنەوار داوای 100 پاسەوان دەکات بۆ پاراستنیان.
بە سۆراغی 964+ زیاتر لە 500 شوێنەواری مێژوویی لە قەزای ئاکرێ و بەردەڕەشی سەر بە پارێزگای دهۆک بوونیان هەیە. بەڵام تەنها 15 پاسەوان بۆ چاودێریکردنیان دامەزرێندراون.
هیوا شیمال ئەحمەد، بەرێوەبەری شوێنەوار و کەلەپووری قەزای ئاکرێ بە 964+ـی راگەیاند: گروپێک لە ماوەی دە ساڵی رابردوودا دروستبوون و دەستکاریی شوێنەوارەکان دەکەن و پارچەیان لێدەدزن.
دەشڵێت؛ 50 شوێنەوار دەستکاری کراون، کە زیاتر کەنیسە و ئەشکەوتن.
گرووپەکە لە دوای ساڵی 2013ـەوە دروستبوون و “تا ئێستا دەستگیرنەکراون”.
هیوا شیمال وتیشی “داوامان کردووە 100 پاسەوانمان بۆ دابمەزرێندرێت، چونکە بە 15 پاسەوانەوە ناتوانین هەموو شوێنەوارەکان بپارێزین، بەڵام تا ئێستا وەڵاممان نەدراوەتەوە”.