قایمقام: سزای توندیان ده‌ده‌ین
له چۆمان به‌دواى ئه‌و كه‌سانه‌وه‌ن كه گوڵه شلێره‌كانیان له‌ناوبردوون
964+
فه‌رهاد حه‌سه‌ن
سه‌رله‌به‌یانى ئه‌مڕۆ ڤیدیۆیه‌ك بۆ قایمقامى قه‌زاى چۆمان نێدراوه تێیدا له‌ناوبردنى ژماره‌یه‌ك زۆری گوڵه‌شلێر له سنوورى قه‌زاكه‌ى ده‌بیندرێن.
قایمقام به‌و ڤیدیۆیه توڕه بووه و به‌و به‌یانییه هێزه ئه‌منییه‌كانى راسپاردووه به‌دواى بكه‌رانى ئه‌م كاره‌دا بگه‌ڕێن و ده‌ستگیریان بكه‌ن.
به‌پێی گرته ڤیدیۆیه‌كه ده‌یان گوڵى شلێر هه‌ڵكه‌ندراون و له شوێنى خۆشیان به‌جێهێڵدراون.
ئه‌حمه‌د بارزان عه‌لیكۆ، قایمقامى چۆمان به 964ـى راگه‌یاند، كاتژمێر شه‌شى به‌یانى ئه‌مڕۆ ئه‌و گرته ڤیدیۆیه‌یان بۆ ناردووه و ئه‌ویش ده‌ستی به رێكاره‌كان بۆ ده‌ستگیركردنى بكه‌رانى ئه‌م كاره كردووه.
وتیشی “ئه‌و شوێنه‌ى گوڵه‌شلێره‌كانى لێ شێوێندراون ناوى چیكان و له‌سنوورى ناحیه‌ى حاجی ئۆمه‌رانه”
ئاماژه‌ى به‌وه‌ش كرد، وه‌ك رێكارێكی سه‌ره‌تایی ته‌واوى ئه‌و رێگایانه‌یان داخستوون كه بۆ ئه‌و شوێنانه ده‌چن كه گوڵه‌شلێری لێ رواون.
دووپاتیشیكرده‌وه، پێویسته ئه‌و كه‌سانه ده‌ستگیر بكرێن و تووندترین سزاش وه‌ربگرن.
به پێی زانیارییه‌كانى 964، ساڵی پار به‌هه‌مانشێوه ژماره‌یه‌كی زۆرى گوڵه‌شلێر له سنوورى چۆمان به ره‌گه‌وه هه‌ڵكه‌ندرابوون و فڕێدرابوون، ئه‌وكاتیش له‌لایه‌ن كه‌سانى نه‌ناسراوه‌وه ئه‌م كاره كرابوو، هیچ كه‌سێكیش ده‌ستگیر نه‌كرا.
شێواندن و له‌ناوبردنى گوڵى شلێر له سنوورى باڵه‌كاتى له‌كاتێكدا كه له به‌شێك گونده‌كان كار بۆ پاراستنى ئه‌و جۆره گوڵه و زیادبوونیان ده‌كه‌ن و ته‌نانه‌ت له‌یه‌كێك له‌گونده‌كان به‌ناوى ناوه‌نده پڕۆژه‌یه‌ك بۆ پاراستنى گوڵه‌شلێر جێبه‌جێ ده‌كرێت.