راپۆرتی هێرشکردنە سەر کۆرمۆر دەدرێتە سوودانی

پێشەوا محەمەد

ئەو لیژنەیەی لە بەغداوە سەردانی کێڵگەی کۆرمۆری کرد لە چەمچەماڵ گەڕانەوە، سەرچاوەیەکی ئاگادار بە 964ـی وت، راپۆرتێکیان ئامادە کردووە و دەیدەنە سەرۆکوەزیرانی عێراق.

کاتژمێر 6:45 خولەکی ئێوارەی دوێنێ هەینی، بە درۆن هێرش کرایە سەر کێڵگەی غازی کۆرمۆر لە قەزای چەمچەماڵ و بەو هۆیەوە چوار کارمەندی خەڵکی یەمەن، کە لە کێڵگەکە کاریان دەکرد گیانیان لە دەست دا و دوانی دیکەش بریندار بوون.

هەر ئەو شەوە حکومەتی عێراق بڕیاری پێکهێنانی لیژنەیەکی دا و نیوەڕۆی ئەمڕۆ گەیشتنە چەمچەماڵ بۆ لێکۆڵینەوە لە هێرشەکە.

سەرچاوەیەکی ئاگادار لە هاتنی لیژنەکە بۆ چەمچەماڵ، کە نەیویست ناوی ئاشکرا بکرێت بە 964ـی راگەیاند، لیژنەکە چوونەتە کێڵگەکە و هەڵسەنگاندنی خۆیان کردووە و راپۆرتێکیان ئامادە کردووە.

ئەو سەرچاوە ئاشکراشی کرد، چەند کەسێکی ئەمنیی هەرێمیش لەگەڵ لیژنەکە بەشداریی لێکۆڵینەوەکەیان کردووە، بەڵام راپۆرتەکە ئاشکرا نەکراوە و راستەوخۆ دەدرێتە محەمەد شیاع سوودانی، سەرۆکوەزیرانی عێراق.

کێڵگەی غازی کۆرمۆر کەوتووەتە ناحیەی قادرکەرەم لە قەزای چەمچەماڵ و ناوبەناو هێرشی دەکرێتەسەر.