کاڵەکە دەستبەسەرداگیراوەکە - وێنە: ئیدارەی ناحیەی بیارە
لە مەرزی تەوێڵە - شووشمێ
دەستبەسەر زیاتر لە 12 تۆن کاڵەکی خراپبوودا گیرا
964+
پێشەوا محەمەد
لە مەرزی تەوێڵە – شووشمێ دەستبەسەر بڕی 12 تۆن و 340 کیلۆگرام کاڵەکی خراپبوودا گیرا.
کاڵەکەکە ئەمڕۆ پێنجشەممە 25.4.2024 براوەتە مەرزەکە و هەوڵ دراوە بهێنرێتە هەرێمی کوردستانەوە و ساغ بکرێتەوە.
لە سنوورى مەرزى تەوێڵە – شوشمێ، لیژنەیەک لە ئاسایش و پۆلیس و کوالێتىی کۆنتڕۆڵ و تەندروستى، بە سەرۆکایەتىی بەڕێوەبەرى ناحیەى بیارە پێکهێنراوە، هەر خۆراک و کاڵایەک بێتە مەرزەکە پشکنینى بۆ دەکەن و ئەگەر بەسەرچووبێت یان شیاو نەبێت بۆ خواردن تەلەف دەکرێتەوە و رێگرى لێدەکرێت بهێنرێتە سنوورى هەرێمى کوردستان.
“هەندێجار خواردن دێت بەسەرنەچووە یان خراپ نەبووە، بەڵام مەرجەکانی حکومەتی عێراقی تێدا نین و لەوکاتانەدا ئەو شمەکەی هێندراوە لەناونابرێت و دەگەڕێندرێتەوە”، حەمید بارام وای وت.
لە بارەی هۆکاری دەستبەسەرداگرتنی باینجانەکە، حەمید بارام وتی، “کۆنە و کوالێتییەکەی بە کەڵکی بەکارهێنان نایەت، بەوهۆیەوە شیاویش نییە بۆ خواردن و ئەگەر خاوەنەکەی بیگەڕێنێتەوە بۆ ئێران دەتوانێت ئەگەرنا ئێمە ناهێڵین بێتە ناو هەرێمەوە و لەناوی دەبەین”.
ساڵی رابردوو لە مەرزی تەوێڵە – شوشمێ دەستبەسەر 500 تۆن کاڵا و خواردنی بەسەرچوو و خراپبوودا گیراوە، بەشێکیان لەناوبراون و بەشێکیشیان بۆ ئێران گەڕێندراونەتەوە.
مەرزی تەوێڵە – شوشمێ پارێزگای هەڵەبجە دەبەستێتەوە بە پارێزگای كرماشانەوە، دوایين ناوچە لە دیوی هەرێمی كوردستانەوە شارەدێی تەوێڵەیە، كە 22 کیلۆمەتر لە ناوەندی پارێزگای هەڵەبجەوە دوورە.