ئیدارەی سۆران: مامەڵەکردن بە زەوی بەدەر لە یاسا قەدەغەیە

964+

ژووری هەواڵ

ئیدارەی سەربەخۆی سۆران بە فەرمی مامەڵەکردن بە زەوی و زاری بەشێوەی نایاسایی قەدەغە دەکات و نوسینگەکانی خانوبەرەی لە سنووری ئیدارەکە ئاگادار کردووەتەوە لەم بابەتە.

ئەمڕۆ چوارشەممە 27.3.2024، ئیدارەی سەربەخۆی سۆران رایگەیاند، وەزارەتی ناوخۆی هەرێم بڕیارێکی دەرکردووە و ئەوانیش ناردوویانە بۆ سەرجەم قایمقامیەتەکان کە نابێت رێگە بدرێت بە مامەڵەکردن و کڕین و فرۆشتن بە زەوی و زاری حکومی بەدەر لە یاسا.

بەگوێرەی نوسراوەکەی وەزارەتی ناوخۆ، هەر کەسێک لە سنوری ئیداری سۆران مامەڵە بە زەوی و زاری حکومی بکات بەدەر لە یاسا، ئەوا رێکاری یاسایی لەبەرامبەری دەگیرێتەبەر.

لە مانگی 8ـی ساڵی رابردوو، دوای زیاتر لە حەوت مانگ چاوەڕوانی، زەوییە سندوقییەکان و ئەو زەویانەی کارتیان هەیە لە سۆران رێگەیان پێدرا مامەڵەی دروستکردنی خانوو بکەن کە پێشتر له نەخشەی کۆن رێگەیان پێنەدەدرا.

خانووە زیدەڕەوەکان و گوندەکانی پێشوو کە ئێستا بوون بە بەشێک له گەڕەکەکانی سۆران، بەشێکی تر بوون لە کێشەکانی هاوڵاتیان بەهۆی ماستەر پلانی پێشوو.

ئیدارەی سۆران پێکدێت لە قەزاکانی سۆران، سیدەکان، مێرگەسۆر، چۆمان، رواندز و خەلیفان.

قەزای ناوەندی سۆران 57 گەڕەک و 400 گوند لەخۆدەگرێت.

 لە سۆران دەست بە جێبەجێکردنی یەکەکانی کرێنشینان کرا